José Antonio García: «Queremos un equipo forte que transmita que Sarria está sendo hipotecada»

UXÍA CARRERA SARRIA / LA VOZ

SARRIA

ALBERTO LÓPEZ

O concelleiro defende que o PP se vai renovar para chegar «forte e unido» ás eleccións

16 ene 2022 . Actualizado a las 05:00 h.

Tras 14 anos presidindo o PP en Sarria, dos que catro estivo na alcaldía, José Antonio García anunciou o pasado xoves que deixaba o cargo. Aínda que o popular continúa como portavoz e concelleiro, o partido comeza agora unha nova etapa da que, polo momento, o sarriano seguirá formando parte.

—Por que deixa a presidencia?

—Despois de 14 anos de presidente, é bo que o propio partido renove as estruturas como están facendo os demais concellos. O venres xa lle trasladei aos afiliados a proposta porque era o máis obxectivo. Agora a xestora, da que eu formo parte, na que está representada todo o PP de Sarria, levará de xeito consensuado a funcionalidade do partido.

—Non hai nomes para ocupar a presidencia?

—Ese é o traballo da xestora. Primeiro, renovar o partido e despois, tomar as decisións pertinentes para escoller a alguén, que pode pasar antes ou despois das eleccións. Dependendo tamén de cando se celebre o congreso.

—Seguirá na próxima candidatura?

—Non hai nada decidido.

—Cal é o obxectivo da renovación?

—O PP ten un único obxectivo: acadar o goberno municipal porque cremos que socioloxicamente temos esa posibilidade. Queremos chegar ás eleccións do 2023 fortes e unidos nun proxecto que ilusione aos sarrianos. E porque cremos que o goberno actual é un completo desastre e está hipotecando Sarria.

—Por que?

—Nas cuestións económicas, Sarria está pasando, como o resto do mundo, unha situación de pandemia e crise. O goberno actual é o único que non deu axudas. Están gastando o diñeiro en privatizacións millonarias foráneas, como o da luz, e en contratos de renting por encima do valor marcado; autorizouse por primeira vez gastar o remanente e estase gastando en ofertas de contratación que non son competitivas. Ademais, entrou en operacións urbanísticas coa compra de inmobles que agora están xudicializadas, que estamos esperando que se resolvan, e non afrontou a creación de chan industrial. O Concello de Sarria é decadente. É unha cabeceira comarcal de servizos, pero renunciamos á capacidade inversora. Por iso é unha prioridade nosa ter un equipo forte que transmita durante este ano e medio que Camiña Sarria e Garrido están hipotecando ó Concello.

—Que balance fai dos 14 anos como presidente do PP?

—Por suposto, positivo. Como na vida mesma, hai bos e malos momentos, pero agradezo o apoio da xente en todos estes anos. Aínda que non hai balance como tal porque non é unha despedida. A mensaxe é de continuidade.

—O partido segue arrastrando o que derivou do plan de encauzamento na súa alcaldía?

—Sen dúbida foi o momento máis difícil. Xa non só polas protestas, porque é lexítimo e cada un opina o que quere, pero fíxose un aproveitamento político dese asunto. Os que paralizaron Ponte Ribeira hai sete anos son os que gobernan agora no concello. Paralizaron a reconstrución da ponte, o xulgado déranos a razón, e aínda non pediron perdón por acusar a moita xente de facer un delito patrimonial. Agora no concello volveron rexeitar a reconstrución da ponte e apostaron por unha pasarela provisional, na cal o concello condicionou á Confederación co de que se vai tirar en catro anos. Mentres, a ponte definitiva podíase facer pero non se quixo.

—O PP é dos partidos máis votados, pero non tivo a alcaldía polas coalicións. Que análise fai dos numerosos grupos que ocupan a corporación?

—Sarria é un concello moi plural e con moita idiosincrasia propia. Houbo dez candidaturas con 20 candidatos. É dicir, 200 familias. É case imposible que un cidadán non teña un familiar nalgunha delas. Esta pluralidade implica unha división que é mala. Respectando sempre o que vota a xente e o dereito de todo o mundo a presentarse a unhas eleccións, é certo que ao final os resultados saen adulterados porque se perden moitísimos votos. Das dez que se presentaron, cinco non conseguiron concelleiros. Iso son moitos votos de xente que agora non está representada no concello. Un concello que aspire a ter un futuro forte, debe ter unha representación forte. Estou seguro de que nas próximas eleccións non vai haber tantas candidaturas e o reparto de concelleiros vai ser máis axustado á realidade de Sarria.

—Que diferenza ao PP das outras nove candidaturas?

—O PP promete no que queda de lexislatura un traballo necesario para ofrecer no 2023 un proxecto solvente, unido e forte. A ideoloxía e os criterios do PP son unha oferta de futuro en Sarria, Galicia e España. Defendemos o paraugas dun partido importante que está nas institucións. E ter unha sintonía total coa Xunta é fundamental para Sarria. A súa falta fai que o Concello actual perda subvencións ou nin sequera as solicite, porque está en clave independente.