Lugo: Gandeiro e veterinario de 27 anos de Sarria: «Antes un quedaba na granxa por non valer; agora somos universitarios»

Cando un remata os estudos, atópase ante un mar de posibilidades e, sobre todo, de incertezas. Non foi o caso de David, que sempre tivo claro que a súa formación era un trámite a compaxinar co que de verdade quería: estar á fronte da súa explotación familiar. Estudou Veterinaria en Lugo e, dende que acabou aos 23 anos, comezou a traballar de veterinario na Agrupación de Defensa Sanitaria (ADS) de Sarria, coa que asesora 90 granxas. Para David, o máis importante non é o traballo en si, senón que lle permita ocuparse á vez da súa gandaría, de 105 cabezas. Este sarriao estudou a mellora da súa explotación no Traballo Fin de Grao (TFG) e así conseguiu incrementar a súa produción. É un exemplo das novas xeracións de gandeiros: teñen formación especializada e así conseguen progresar no sector primario.