Renace o grupo folk Xanzá en plena pandemia

O confinamento e a creatividade dos músicos sarriáns levounos a traballar xuntos trece anos despois de abandonar os escenarios


La Voz / Lugo

Confinamento e creatividade aliáronse para que, en plena pandemia, un novo grupo vise a luz: Xanzá. Esta banda folk nacera en Sarria no ano 2003 e estivera en activo ata o 2007, momento en que os compoñentes se separaron para seguir as súas carreiras profesionais, tras ser finalistas en dúas ocasións no Certame Folk de Radio Obradoiro e gañadores do Concurso Festival da Terra e da Lingua. Porén, o confinamento volveunos reunir virtualmente e xa levan dous temas gravados e compartidos en redes, cunha grande acollida por parte do público.

Un dos músicos sarriáns, Borja López, explica que a idea xurdiu de forma espontánea: «Estivemos falando entre nós de que había que facer algo desde a casa e animámonos. Agora cos móbiles é máis sinxelo, antes as gravacións eran máis difíciles», sinala. Primeiro animáronse cunha Muiñeira de Cabana, pero ante o éxito e a proximidade das Letras Galegas, decidiron lanzarse coa Sementeira, que compartiron nas redes sociais o domingo. Recoñece que a gravación deste segundo tema foi máis laboriosa e implicou a moitos familiares e amigos; ademais, foi gravada desde as súas casas en Sarria, Córdoba, Monseiro e A Coruña.

A acollida deste novo proxecto musical está sendo moi boa, e os músicos están cada vez máis cómodos con esta iniciativa. Tanto é así que o proxecto non quedará en colaboracións puntuais, senón que Xanzá renaceu e o máis probable é que volva aos escenarios. Polo momento, dentro duns días comezarán a traballar noutro tema para gravar desde as casas.

Os músicos que están dando vida a esta nova etapa de Xanzá son Ismael García, David Páez, Carmen López, Andrea Seijo e Borja López, con frautas, gaitas, percusión, guitarra, piano e voz. Todos eles son de Sarria, un gran viveiro de músicos: «É un fenómeno raro o de Sarria, porque é certo que hai moita vida musical. Pode ser que se deba a que hai moi boa canteira. Eu comecei de neno na Banda, e había moitos máis nenos, e moito interese da xente en que os cativos aprendesen música», comenta López.

En canto ao futuro do sector, López recorda que «o mundo da música sempre foi complicado» e, a pesar da incerteza que hai, móstrase optimista: «A xente ten ganas de saír desta e ten ganas de música e de saír á rúa. Haberá que idear novas fórmulas, e xa están xurdindo ideas para facer actuacións adaptadas ás circunstancias, pensando nas terrazas, por exemplo», continúa.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Renace o grupo folk Xanzá en plena pandemia