A actual concelleira e responsable da granxa A Cernada sustitúe ao histórico Horacio Rouco
04 feb 2023 . Actualizado a las 18:16 h.Ana Corredoira é a candidata do PSOE á Alcaldía de Palas de Rei. A militancia do municipio acordou nunha asemblea convocada pola Executiva Local que a gandeira e bióloga, dedicada á produción de leite ecolóxico á fronte da granxa A Cernada, lidere o proxecto do PSdeG neste concello de cara ás eleccións municipais do vindeiro 28 de maio.
O secretario xeral do Partido Socialista na provincia, José Tomé Roca, participou neste encontro da militancia de Palas, xunto coa secretaria de Organización provincial, Pilar García Porto, e o secretario seral da Agrupación Local e voceiro municipal socialista, Horacio Rouco, que deixará de ir como cabeza de lista en Palas tras catro mandatos consecutivos.
José Tomé Roca subliñou que «a súa formación, traxectoria e proxección» fan de Ana Corredoira «unha candidata con capacidade gañadora para darlle a Palas de Rei o impulso que precisa». Tomé Roca destacou a «defensa e o compromiso co rural que vén demostrando dende hai moito tempo» a candidata, «aportando valor a un sector fundamental para Palas, A Ulloa e o conxunto da nosa provincia e o país como é a produción ecolóxica, na que ela mesma é hoxe un referente».
En palabras do secretario xeral dos socialistas na provincia, «persoas como Ana Corredoira representan o mellor das nosas tradicións agrogandeiras, e a nosa capacidade para apostar polo futuro, pola innovación e por seguir as grandes liñas de traballo que marca a UE. Persoas como Ana traballan día a día, volcándose para impulsar un sector dende o respecto ó coidado do medio ambiente e ao benestar animal».
O líder dos socialistas puxo en valor «o paso adiante de Ana Corredoira e a capacidade do PSdeG para captar talento». Así mesmo, agradeceu «a dedicación e gran traballo que fixo Horacio Rouco en favor de Palas de Rei e para o dinamismo e crecemento do Partido Socialista». Para José Tomé, o relevo representa «a capacidade dos socialistas para renovar as nosas propostas mantendo o núcleo da nosa identidade de defensa dos servizos públicos, as políticas sociais e o compromiso co rural».
Ana Corredoira ten 33 anos de idade. Como ela mesma se define, é bióloga de formación e gandeira de profesión e vocación, dedicándose a produción de leite ecolóxico. Medrou en Palas e sempre estivo vinculada ao rural e ao sector primario, implicándose activamente na defensa deste territorio, das súas posibilidades e da construción do seu futuro.
Unha vez elixida no seo da asemblea da militancia, Ana Corredoira presentará nas vindeiras datas a súa candidatura aos veciños e veciñas de Palas de Rei, nun acto ó que acudirá o Secretario Xeral do Partido Socialista na provincia, José Tomé Roca.
