Queixa dunha asociación de mulleres de Navia pola perda dunha subvención da Xunta
NAVIA DE SUARNA
Un grupo de integrantes da Asociación de Mulleres Rurais Ledicia, do concello de Navia de Suarna, concentráronse o venres na capitalidade municipal para denuncia a perda dunha subvención da Consellería de Traballo. Foi debido, din, ao establecemento duns «baremos totalmente inalcanzables para esta ou calquera pequena asociación do rural da montaña».
O colectivo di que no 2007 «tivemos a sorte de podernos acoller á subvención para contratar unha traballadora e, ano tras ano, fomos cumprindo os requisitos esixidos». Engade: «Sempre esperabamos con ilusión a carta de aprobación da axuda. Era un posto de traballo neste concello e non só iso, era unha persoa para traballar por todas e todos e facer máis amena a vida nun territorio tan disperso, envellecido, tan deprimido e maltratado por parte da Administración (...). Este ano a ilusión truncouse dando paso a gran rabia e desilusión. Este ano creáronse uns baremos de puntuación totalmente inalcanzables (...)».
Menos servizos
A asociación, formada a finais do 2005, destaca que o rural non é «interesante politicamente, pero socialmente si que o é, e moito; esta ía ser a lexislatura do rural, pero o certo é que cada vez temos menos servizos, e non é porque non se aumenten, é porque se nos vai privando dos que tiñamos antes. E non falamos de luxos, falamos de ter servizos médicos de garda ás dez da noite, a pesar de estar lonxe dos hospitais».