Lugo celebrará o 25 de abril cun canto popular de «Grándola, Vila Morena» na Mosqueira

O tenente Alcalde do Concello de Lugo, Rubén Arroxo, acompañado da concelleira de Cultura, Turismo e Promoción da Lingua, Maite Ferreiro, e os directores musicais de corais Bruno Villamor e Fernando Gómez Jácome, presentaron este martes en rolda de prensa os actos que o Concello de Lugo organizará para conmemorar o 25 de abril, Día da Revolución dos Caraveis. 

O acto central será un canto popular aberto da canción «Grándola, Vila Morena», que terá lugar o vindeiro venres 25 de abril ás 19.30 horas na Mosqueira. «A cidadanía lucense está convidada a participar nesta homenaxe colectiva, que estará dirixida polos propios Bruno Villamor e Fernando Gómez Jácome, referentes no ámbito coral da cidade», explicou a concelleira de Cultura. 

Rubén Arroxo indicou que a celebración, conducida polo xornalista Félix Jorquera, «incluirá o reparto de caraveis vermellos, símbolo da revolución portuguesa, así como copias da letra da canción, co obxectivo de favorecer a participación activa de todas as persoas asistentes». 

Maite Ferreiro destacou o valor simbólico e emocional do evento: «Queremos que Lugo celebre o 25 de abril como se fixo tradicionalmente: na rúa, cantando e reivindicando a liberdade. «Grándola, Vila Morena» representa o espírito da revolución pacífica e, ao mesmo tempo, é unha chamada á unidade e á esperanza». 

Este tipo de actos, insistíu o tenente Alcalde, «permiten reforzar o compromiso do Concello de Lugo cos valores democráticos, coa memoria histórica e coa cultura popular, nun momento de unión e participación cidadá que queremos compartir con toda a veciñanza». 

Con este acto, a Tenencia de Alcaldía lembra o 25 de abril como unha data simbólica na loita pola liberdade e os dereitos fundamentais, promovendo a memoria histórica mediante a acción cultural colectiva.

---

---

---