A primeira «Escola na Natureza» de Galicia vén de comezar o seu campamento de verán. Sitúase no epicentro das Terras do Miño, en plena reserva da biosfera lucense
12 jul 2024 . Actualizado a las 20:32 h.O Campamento Nenea comeza a súa segunda semana de actividade en xullo. As accións, realizadas en plena natureza, seguen a liña do seu particular proxecto educativo. «Achegarémonos á linguaxe das plantas, aos seus segredos, ao seu coñecemento ancestral, cociña, apócemas, cremas, tinturas... E moito máis viviremos esta semana, sempre con moito xogo nesta contorna privilexiada», afirman no seu perfil de Instagram.
«Que a infancia se beneficie de todas as vantaxes do contacto coa natureza»
Está dirixido a cativos de entre 3 e 9 anos. Dende Nenea permiten que os máis pequenos gocen dos bosques de Lugo o tempo que queiran, xa que a duración do campamento é de unha a catro semanas. Os prezos varían segundo os días de matriculación, puidendo profundizar no «recoñecemento de insectos, búsqueda de rastros, roteiros guiados, observación de aves, obradoiros de creación, contos e cantos». Así o indica o equipo pedagóxico no seu cartaz.
A primeira Bosqueescola
A asociación educativa Nenea nace no ano 2014, convertíndose no primeiro proxecto educativo de Escolas no Bosque en Galicia. Diríxese a crianzas de entre 3 e 6 anos, polo que equivale á etapa de Educación Infantil. Ubícase «nun lugar privilexiado», segundo a propia Nenea, «na antiga Escola Unitaria de San Xoán do Alto», a escasos 6 quilómetros do centro de Lugo.
Ademais, o pasado sábado tivo lugar a celebración polo noveno aniversario de Nenea. A festa contou coa participación das familias, do persoal docente e dos colaboradores que forman parte da esencia da escola. Participaron numerosas empresas de Lugo, que amenizaron a xornada con actividades lúdicas para os cativos. Tamén se incluiu un contacontos e unha actuación musical, así como un obradoiro de arte biodegradable.
Nas bosqueescolas as actividades educativas desenvólvense ao aire libre, aproveitando os recursos e a contorna natural das Terras do Miño. Pero nos días de choiva non deixan que os nenos do bosque estean mollados e collendo frío. «Temos un espazo axeitado para pasar os días nos que a climatoloxía é moi adversa ou que o benestar do grupo precisa entrar. Unha aula con paredes e teito que nos facilita moito o desenvolvemento do día a día no bosque», aseguran dende Nenea. Como o resto de colexios, veñen de abrir o seu período de matriculación para o vindeiro curso 2024-2025.
Un proxecto educativo para andar na terra
«As nosas accións son diferentes porque nos adaptamos ás características do grupo e ao que nos ofrece a vida», destacan na súa páxina web. O seu cole é o propio bosque e «a natureza é a nosa aula». Respectando o currículo legal, intentan fomentar unha serie de valores e crenzas que vinculen aos cativos á terra. Insisten en afianzar no seu alumnado a concienciación medioambiental, o pensamento crítico, a creatividade, a autonomía e a autoconfianza.
«O noso proxecto pedagóxico desenvólvese tendo en conta un enfoque curricular transversal que conecta as diferentes áreas do currículo oficial de Educación Infantil cumprindo coas esixencias requiridas», indican. O seu modelo bebe os proxectos educativos Waldorf, Montessori ou das Galescolas de Galicia, desaparecidas no 2009.