O conselleiro de Cultura coñece o caso do adro da Catedral de Lugo

suso varela LUGO / LA VOZ

LUGO CIUDAD

Esta semana comezaron as obras de mellora do pavimento do adro, onde se fixeron catas arqueolóxicas OSCAR CELA

A consellería polo momento garda silencio sobre se hai ou non que seguir coas escavacións

23 ene 2022 . Actualizado a las 05:00 h.

O conselleiro de Cultura, Román Rodríguez, xa coñece, por diversas fontes, a situación na que se atopa o adro da Catedral e o debate aberto polo arqueólogo Celso Rodríguez, co apoio da USC, para aproveitar a mellora do pavimento que afronta o Bispado para facer unha escavación arqueolóxica en profundidade.

Polo momento, desde a Consellería de Cultura gardan silencio sobre se apostan ou non por continuar coas catas e, logo de ver os resultados, decidir se se aproveita a ocasión para abrir unha gran escavación. Celso Rodríguez considera que debaixo do adro, e dando continuidade á Domus dos Mitreo, «agóchase un importante depósito do mundo romano», polo que o martes fixo un chamamento ás distintas Administracións para que se impliquen nunha actuación máis ambiciosa. As hipóteses coas que se traballa é que debaixo do adro haxa máis estancias da citada domus señorial, as cloacas romanas que dan continuidade ás atopadas no claustro catedralicio e unha calzada romana que se estendía cara a Rúa Nova.

Concello e Deputación xa anunciaron que apoiarían que se fixeran máis escavacións, pero lembran que é a Dirección Xeral de Patrimonio quen ten que dar o paso. A USC xa se posicionou e aportaría todo o apoio investigador. Pola súa parte, desde o Bispado sinalan que as obras de mellora do pavimento teñen licenza para estar finalizadas en marzo, pero hai persoas do ámbito da Catedral que non verían con malos ollos seguir coa escavación.

É Patrimonio Mundial

A construción da fachada a occidente da medieval fixo necesario a finais do século XVIII contar cun novo adro. Como teñen exposto Adolfo de Abel Vilela e Izquierdo Perrín en varios artigos, o adro foi deseñado por Miguel Ferro Caaveiro e executado polo mestre de obras Alejo Frieire. Caaveiro incluso detallou no proxecto a eliminación do cubo esquerdo e da Porta do Postigo, hoxe de Santiago. Os traballos finalizaron —non se certas disputas co Concello pola ocupación dos terreos— en 1788, antes incluso de que rematase a construción das torres da Catedral. O adro que vemos agora apenas tivo modificacións desde que se construíu, salvo unhas obras de reforma de todo o entorno xusto hai un século. Forma parte do conxunto que foi catalogado como Patrimonio Mundial.