Comeza unha nova iniciativa cultural para promover a creación artística a través da lingua
15 abr 2021 . Actualizado a las 11:28 h.A edil de Cultura, Maite Ferreiro, e o tenente de alcalde, Rubén Arroxo, presentaron a iniciativa EnRedando co Galego, organizada pola área de Cultura e a Asociación de Escritoras e Escritores en Lingua Galega en varios institutos de Lugo. Ferreiro explicou que buscan «promover o uso do galego entre a mocidade, e a creación literaria e artística a través da lingua». Deste xeito, durante os vindeiros 21 días o estudantado dos centros poderá participar en dúas experiencias distintas: unha inmersión lingüística, compartindo nas redes sociais as súas reflexións sobre o proceso; ou unha experiencia de creación literaria e artística, na que deberán crear obras literarias en galego en formato escrito e dixital, e enviala á Escola de Escritoras e Escritores da AELG. Os participantes entrarán no sorteo de material electrónico, lotes de libros de literatura galega e outros agasallos.
A presentación contou coa actuación musical en directo de Aldaolado e Lois Pérez. A área de Cultura e a AELG organizarán un fin de festa cun intercambio de experiencias dos participantes e actuacións en directo.
Maite Ferreiro explicou que «nos últimos días vimos de coñecer un novo informe do Consello de Europa que alerta sobre a situación do galego entre a mocidade, especialmente no eido do ensino. Desde o Concello de Lugo buscamos colaborar en reverter esta situación e garantir o coñecemento da nosa lingua entre a mocidade. Agardamos conseguir a colaboración de máis centros nas vindeiras edicións do certame».