Irene Pin, directora audiovisual de Lugo: «O público novo ten fame de series web en galego»

Laura López LUGO / LA VOZ

LUGO CIUDAD

A lucense Irene Pin escribiu e dirixiu a serie «Amnesia 3.0» PAULA CERMEÑO

A súa rompedora proposta «Amnesia 3.0», primeira webserie interactiva en galego, é finalista nos Premios Mestre Mateo

23 mar 2021 . Actualizado a las 05:00 h.

O audiovisual galego explora, con grande éxito, novos formatos e xéneros. Para mostra, a rompedora proposta Amnesia 3.0, primeira webserie interactiva en galego que acaba de ser nomeada finalista nos Premios Mestre Mateo. Irene Pin (Lugo, 1995) escribiu e dirixiu esta miniserie de tres capítulos coa que fixo unha aposta arriscada, tanto polo xénero, a ciencia ficción, como polo formato, unha serie web interactiva e en galego, marcando un fito na ficción dixital galega. E todo cun orzamento reducido.

-Como nace «Amnesia 3.0»?

-É un proxecto moi ambicioso. A idea tíñaa aparcada desde que a escribira nos anos de carreira. Pero no 2019 vin a convocatoria do Festival de Contidos Dixitais Carballo Interplay e volvín sobre a idea da serie web en galego. Propúxenllelo a Iria Iglesias e a Natalia Porca e pareceulles unha boa iniciativa. Así que o presentamos e escollérono, polo que xa nos puxemos a traballar na realización, adaptándonos ao orzamento que nos aportara o Carballo Interplay.

-Unha aposta arriscada en Galicia, non si?

-En Galicia nunca se fixera unha serie web interactiva en galego, é algo curioso, pero nós imos máis alá e non queremos que se quede na anécdota do formato, senón que se integre na historia. O formato interactivo permite que, chegados a un punto da historia, o espectador poida escoller entre varias opcións, polo que, dependendo do itinerario, o espectador percibirá a historia de xeito diferente; fuximos do maniqueísmo. A historia completa pode percibirse vendo todos os camiños. Porque non só elixes un itinerario, senón tamén pode ser unha personaxe coa que percibes a acción desde o seu punto de vista.

-Cambia moito a rodaxe con este novo formato?

-A preparación previa é maior, tés que ter moi claro o que queres e o que necesitas; unha vez feito iso, a rodaxe é similar.

-Haberá estrea presencial?

-A estrea virtual foi no Interplay de Carballo, e en maio faremos unha estrea presencial no Cinema Numax de Santiago de Compostela. Despois presentarémola en varios lugares, entre eles, Lugo, pero aínda non temos as datas pechadas. Agora estamos traballando na segunda tempada e incorporando elementos á interactividade, como algún minixogo.

-Está o público galego preparado para estes novos formatos de consumo?

-Si que está preparado, a veces subestimámolo, pero o público novo ten fame de series web en galego, e este tipo de series, por ser de ciencia ficción e polo seu formato, funcionan moi ben entre os máis novos. Neste sentido, cubrimos unha necesidade de contidos, e o público demanda que se creen máis.

-O audiovisual non para a pesar da pandemia.

-É un momento complicado no que estamos intentando readaptarnos ás novas circunstancias, pero seguimos traballando. Eu agora estoulle dando os últimos toques a unha curta, Somos cárcere, e estou en proceso de preprodución doutro traballo audiovisual que codirixo con Dena Parro, sobre o aborto.

Irene Pin, nun momento da rodaxe de «Amnesia 3.0» ZAIRA PALLAS

Ciencia ficción sobre o esquecemento

Segundo resumen no argumento, 265-C érguese cada mañá para seguir o plan de actividades que marca a súa axenda, pero ela non lembra o día de onte. Un software implantado no cerebro humano borra a memoria a curto prazo cada noite, así as persoas poden desenvolver as súas funcións dentro do sistema na engrenaxe perfecta, sen pensar nin preguntarse. Porén, hai quen sobrevive na marxe. Son excluídxs, habitantes das Estremas. Nómades ancoradxs á tradición que foxen dese control e atesouran os vestixios dun pasado sepultado. Fiz e Lía farán estourar a normalidade ao entrar na vida de 265-C, tratando mediante unha tecnoloxía arcaica de reverter o seu bloqueo e facerlle recordar. Ao tempo, as súas accións son perseguidas por un anónimo inspector do Departamento de Seguridade Global.

Amnesia 3.0 está escrita e dirixida por Irene Pin. Iria Iglesias é a reponsábel da interactividade e encárgase, xunto a Rocío López, da posprodución. Cristela Torres e Natalia Porca son as produtoras da ficción. A primeira tempada está protagonizada por Daniel Celester, Sara Ferro, Vanessa Dorrei, Monti Castiñeiras, Duarte Galbán, Isabel Naveira e Sabela Arán. Na segunda únense Lidia Veiga, Melania Cruz ou Mabel Rivera, entre outras.

Amnesia 3.0 é unha proposta para abandonar os límites do relato convencional. Partindo de tres puntos de vista diferentes, o público pode seguir a historia desde un ou outro roteiro. As túas decisións non mudan a historia, pero si como a percibe. Nos momentos en que as personaxes se cruzan, terase a oportunidade de seguir a unha ou outra. Segundo o que se escolla, hai cousas que se verán ou non, intencións ou accións que se cadra se perciben doutro xeito. «Porque como na vida, non todo está tan claro. O importante non é tanto o que che contan, senón como cho contan. E, sobre todo, quen», explican.

A primeira webserie interactiva en galego leva selo arousán

Bea Costa

Aos nados no século pasado, á xeración dos cinco canais na televisión e pouco máis, quizais lles custe adaptarse aos produtos da nova era dixital, pero non queda outra. Os formatos do ocio audiovisual mudan a unha velocidade vertixinosa, o cal obriga a reciclarse e a cambiar os esquemas. Por exemplo, á hora de ver unha serie. Agora podes atopalas á carta, e non pola ampla oferta que despregan as plataformas dixitais, tamén á hora de elixir como se desenvolve a trama. Son as series interactivas, nas que o espectador escolle o final que prefire mediante as ferramentas que ofrece a tecnoloxía.

Seguir leyendo