Escrita, artes plásticas e educación en clave feminina a través de exposicións pola provincia de Lugo
LUGO CIUDAD
As mostras poden verse en Sarria, no MIHL, en Formación do Profesorado ou en Vilalba
13 mar 2021 . Actualizado a las 18:16 h.As salas de exposicións da provincia e outros espazos públicos volven encherse de mostras artísticas e culturais despois das restricións que impuxo a evolución da pandemia. Unha das protagonistas indiscutibles destas semanas é Xela Arias, a escritora sarriá a quen se lle dedican este ano as Letras Galegas. Sobre a súa infancia e os seus anos lucenses abriu unha mostra precisamente na súa terra natal, en Sarria, na Casa da Cultura, baixo o título Aquela nena de Sarria, organizada polo colectivo Egeria co apoio da Xunta. Trátase dunha exposición itinerante de doce paneis nos que se aborda especialmente o tempo na Granxa Escola de Barreiros, da que o pai de Xela, Valentín Arias, era director.
A mostra itinerante xa foi presentada tamén no IES Xograr Afonso de Sarria, antes de iniciar o seu percorrido por outros centros educativos de Sarria e dos concellos limítrofes, para despois continuar a Festa das Letras polo resto de Lugo e de Galicia. Os estudantes poden afondar así no tempo que Xela viviu na Granxa de Barreiros (ata 1965), e en Lugo (ata 1969), onde estudou no Colexio Fingoi. A mostra reflicte a querenza de Xela Arias por Sarria e o rural, o seu vencello co galego e o empeño en que se recoñecese Xela como o seu nome real. Complétase a mostra con poemas dirixidos a Xela por alumnos dos institutos sarriáns Xograr Afonso e Gregorio Fernández, por poetas de Sarria, e de compañeiras poetas galegas que seguen os camiños que Xela trazou, e ata un conxunto de «Vilariñas», especiais micropoemas con imaxes cos que un grupo de membros da Nova Poesía Guitirica honra a Xela no seu ano. Tamén contén una serie de fotografías facilitadas pola familia de Xela e debuxos da pintora lucense Sabela Arias, que conforman un especial complemento ás fotografías que foron o punto de partida da autora para este traballo. A web www.aquelanenadesarria.gal contén todos os detalles deste proxecto.
Arte actual no MIHL
O Museo Interactivo da Historia de Lugo (MIHL) tamén inaugurou nova exposición estes días, Non despaletizar ata destino, organizada polas artistas plásticas locais Kutxyllo, Noemí Núñez, Pia Piadosa e Yoe33, e conta coa instalación multimedia de Robocity e Caskabel, integrantes do Colectivo Ruído. O proxecto xorde da unión das artistas plásticas, que traballan distintas técnicas, formatos e estilos, coma o grafiti, a pintura e a ilustración, entre outros. Para este proxecto, compartiron un mesmo espazo de creación, unindo os seus estilos para conseguir a creación a grande escala dunha obra conxunta composta por fragmentos de obras independentes realizadas expresamente para o MIHL. As artistas utilizaron materiais desbotados, intentando non xerar novos residuos. A iniciativa nace da necesidade das artistas de crear sen que a escaseza de recursos materiais as limite e á súa vez tomar presenza nos espazos expositivos da cidade. Poderá verse ata o 11 de xuño.
Pola súa banda, Vilalba inaugurou a mostra «Mulleres senlleiras» na Praza da Constitución, que estará todo o mes. A iniciativa corre a cargo do Concello, coa colaboración do Iescha. Na exposición recórdase o traballo e o perfil de mulleres que pola súa actividade aínda hoxe, anos despois da súa morte, son coñecidas: as escritoras Carmiña Prieto Rouco e Engracia Vérez, ou a comadrona Concepción Braña. Pero tamén hai espazo para recordar a outras, sen citas nin notas nos libros de historia ou nas páxinas dos periódicos, pero igualmente valiosas e necesitadas de recoñecemento: campesiñas ou costureiras, criadoras de capón ou lavandeiras teñen tamén un oco na mostra.
Historia no Campus
En canto ao Campus de Lugo, a facultade de Formación do Profesorado fai un percorrido pola historia da educación en feminino a través dunha mostra composta por 34 pósteres e paneis, nos que o alumnado de Historia e Teoría da Educación Escolar recupera a memoria de episodios singulares da historia da educación e salientan as importantes achegas realizadas por ducias de educadoras e colectivos femininos ao longo dos séculos. A mostra Educación en feminino: un paseo pola historia pódese visitar ata o 20 de abril.
Tamén hai exposición na igrexa de Santa María de Vilabade, en Castroverde, onde se inaugurou a mostra itinerante O fin do Camiño, organizada por Egeria e a Xunta.