O Concello aproba a Conta Xeral, coa abstención de Ciudadanos e do PP, que afea que apenas se gastase o capítulo de investimentos e que haxa unha suba encuberta de impostos
20 ene 2021 . Actualizado a las 17:16 h.O Concello de Lugo aprobaba esta mañá, durante a celebración dun pleno extraordinario, a Conta Xeral de 2019, axustándose así aos prazos establecidos ao efecto que foran prorrogados até este venres, 22 de xaneiro, debido aos condicionantes que impuxo a pandemia.
Un balance que, como sinalou a edil de Gobernanza, Paula Alvarellos, durante a súa intervención, certifica que a Administración local executou ese ano o 90 % do investimento comprometido. Na súa exposición, a concelleira referiu que en 2019 a institución efectivizou o pago de 78'4 millóns de euros dos 86.864.498'99 que se adxudicaron.
«É dicir, empregamos máis do 75 % dos fondos dispoñibles (114.841.121'04 €) e os executamos nun 90'25 %. Cartos que serviron para facer fronte ao pagamento dos bens e servizos nos que se sustentan todas as prestacións municipais (abastecemento de auga, recollida de lixo e limpeza viaria, iluminación pública, axudas de alugueiro e emerxencia social, funcionamento dos centros de convivencia, actividades de dinamización en xeral, programación cultural e de ocio, reparacións de firme, etc...) pero cos que tamén atendemos os custos de persoal e se sufragan os proxectos licitados», indicou a concelleira.
Pese a que en 2019 os orzamentos estaban prorrogados e carecían de capítulo de investimentos reais o Concello realizou un gasto medio por habitante de 795'46 euros, case 100 euros máis respecto ao ano anterior.
Rebaixa do periodo de pago a provedores a 10 días
A responsable de Gobernanza avanzou igualmente que os indicadores económicos que reflicte a Conta Xeral ratifican a suficiencia financeira do Concello e nomeou variables como a solvencia a curto prazo, que se sitúa no 447'90 % ou a liquidez inmediata, calculada no 225'15 %.
«Isto propiciou tamén que durante 2019 puidéramos rebaixar o Período Medio de Pago a Provedores até os 10'4 días de media, cando a marxe legal son 30, reducíndoa practicamente a un terzo», engadiu.
A recadación tributaria, que supera os 89 millóns de euros, axustouse nun 97'82 % á súa estimación inicial.
Paula Alvarellos facilitou tamén as cifras dos tributos máis cuantiosos para as arcas municipais como pode ser o IBI (21.608.342'26 €) ou o imposto de circulación (5.861.865'33 €), que supoñen o 24'7 % e o 6'71 %, respectivamente, dos ingresos totais e tamén a máis simbólica como é o gravame dos quioscos que ascendeu a 220'60 euros.
«En definitiva ? resumiu a concelleira de Gobernanza - trátase dunha Conta Xeral que, unha vez máis, pon de manifesto que o Concello de Lugo é unha administración solvente, saneada, que amosa un balance positivo e que ademais traballa e se esforza cada ano, para mellorar os indicadores económicos que así nos definen». Alvarellos aproveitou a súa intervención para agradecer ao persoal e aos técnicos municipais da área Económica que, «sen desatender o resto de tarefas ordinarias que teñen encomendadas, como é a elaboración desta Conta, presentada en tempo e forma - o que tamén evidencia o seu bo facer - atenderon igualmente ás prioridades determinadas pola alcaldía, nun ano especialmente complexo, no que amosaron un compromiso absoluto co esforzo que neste 2020 fixo a administración para axilizar o pagamento de facturas e dotar de liquidez, en plena pandemia, ao tecido produtivo local», concluíu a edil.
Abstención do grupo popular e de Ciuadanos
O voceiro do Grupo Popular, Ramón Carballo, xustificou a abstención dos populares na Conta Xeral de 2019 tomando como base o baixo grao de execución do orzamento de investimentos xa que quedou «85% dos 21 millóns sen gastar». Para Ramón Carballo esta situación é moi preocupante porque demostra, unha vez máis, «a incapacidade de xestión do PSOE e o BNG».
O popular tamén recriminou que PSOE e BNG impuxeran para este 2020 subas encubertas de taxas e impostos. Por último, Carballo lamentou que «un ano máis o bigoberno aprobe o documento fóra de prazo», lembrando que o trámite tiña que estar feito o pasado 8 de xaneiro e «que podíamos ter aforrado os cartos que supón convocar esta sesión de pleno extraordinaria. Deixense de tanta terminoloxía bonita para dar titulares sobre Vancuver e céntrense en xestionar e de dar solución aos problemas do día a día dos veciños de Lugo e invistan o que é noso», resumiu Carballo.
Pola súa parte, os dous edís de Ciudadanos tamén se abstiveron xa que criticaron que se foron acumulando remanentes nas contas dos anos 2017, 2018 e 2019 por culpa de non executar as obras presupostadas en vez de por conseguir baixas pola execución, e lembraron que neste 2021 estanse a licitar obras que veñen do orzamento do 2017.