Guido Álvarez, guía lucense: «O turismo de proximidade gañou moita relevancia»

O impulsor de Guido Guía comeza o ano con novos proxectos para dar a coñecer os barrios da cidade e «o Lugo menos coñecido»

Guido Álvarez
Guido Álvarez

Lugo / La Voz

O guía oficial de turismo Guido Álvarez (Lugo, 1985), responsable de Guido Guía, comeza o ano con moita enerxía e novos proxectos. A pesar das restricións e as preocupacións pola pandemia, as ganas dos cidadáns de gozar coas rutas ao aire libre que propón pola contorna e a capacidade de Guido para reinventarse e adaptarse ás novas circunstancias con proxectos atractivos, fan das súas propostas un éxito asegurado.

-Con que iniciativas comeza este 2021?

-Despois dunha pausa na actividade en novembro e decembro, retomei os paseos guiados, sobre todo, para animar á xente. Por agora, son grupos de seis persoas. Por un lado, continúo co programa do Lugo menos coñecido (#OLugoMenosCoñecido) e comezo o primeiro proxecto novo do ano, polos barrios (#BarriosLucenses). A idea dos paseos polos barrios xurdiu porque nestes anos coñecín a moita xente dos barrios de Lugo que participaban nas rutas e contaban anécdotas e curiosidades da zona, e iso é un gran plus porque se xera un intercambio moi importante. Así que nestes paseos contarei polo menos cun veciño do barrio ao que darlle protagonismo para que conte anécdotas, curiosidades... e eu tamén seguirei dando as miñas explicacións como guía. Esta singularidade creo que fai moi especiais estes paseos porque non é fácil que suceda esa interacción noutros lugares. E creo que ocorre porque Lugo, a pesar de ser unha cidade mediana, é moi familiar.

-Cales son os próximos paseos?

-O próximo será este domingo, día 17, polo barrio de Castelo, e esta semana anunciarei novas datas para o que queda de mes. As inscricións poden facerse no correo guidoguiaturismo@gmail.com, nas miñas redes ou na canle de Telegram de Guido Guia. Tamén seguirán os paseos do Lugo menos coñecido e, cando poida subir o aforo, retomarei o Redescubrindo Lugo e repetirei os proxectos do ano pasado, porque tiveron moito éxito. En calquera caso, cada vez estou máis consolidado como guía na cidade e na provincia porque aquí hai moito potencial e necesitamos dálo a coñecer.

Un dos primeiros paseos guiados que organizou Guido Guía este ano foi «Un barrio sen reloxo», dentro do programa de «O Lugo menos coñecido». O próximo terá lugar este domingo, polo barrio de Castelo
Un dos primeiros paseos guiados que organizou Guido Guía este ano foi «Un barrio sen reloxo», dentro do programa de «O Lugo menos coñecido». O próximo terá lugar este domingo, polo barrio de Castelo

-Están tendo moita demanda estes paseos...

-Pola lista de agarda que manexo, de non haber restricións de aforo, nos cinco que levo feitos en xaneiro terían participado máis de trinta persoas en cada un.

-E como foi o 2020?

-Foi un ano de moitas preocupacións e restricións, pero o meu proxecto (comecei como autónomo en agosto do 2019) tivo un grande avance. O turismo de proximidade gañou moita relevancia, pola situación de pandemia, pero tamén porque era unha tendencia que tiña sentido que chegase, a xente ten ganas de coñecer a súa contorna. Realicei 23 capítulos de #OLugoMenosCoñecido; impulsei o #LugoFavorito; iniciei #RedescubrindoLugo, pola provincia; comecei Coidemos Lugo, con Salva Arco; realicei paseos de #ArteUrbana e #LugoFotográfico; comecei como titor no grao de Turismo da UNED; colaborei con Diaconía España; fixen #AMariñaEnRuta con Pedro Rolle; os paseos de Paulo Fabio Máximo coas asociacións do Arde Lucus e o Concello; os Pasos ó solpor; #AndainasPolaSostibilidade; paseos polo #LugoXenealóxico; paseos pola Reserva da Biosfera... E todas as actividades enchéronse, con listas de agarda a veces de ata 40 persoas, mesmo con aforos de 25, e fundamentalmente, con xente de Lugo.

-Foron «terapéuticos» eses paseos?

-Moita xente atopou nos paseos unha vía de escape, unha desconexión, un certo carácter terapéutico, e coa pandemia iso tomou máis relevancia. Ademais, participa moita xente que está recén chegada a Lugo, para socializar, integrarse... e resulta curioso que cando comezo os paseos pregunto se alguén ten problema para entender o galego, e todos, mesmo os estranxeiros, piden que o faga en galego porque o ven como unha oportunidade de inmersión lingüística.

Guido Álvarez: «A xente ten ganas de saír e apoiar proxectos da terra»

Laura López

O guía lucense de turismo explica que en xuño comeza o programa «Redescubrindo Lugo» cun paseo guiado por Piornedo

Guido Álvarez, guía lucense de turismo, responsable de Guido Guía, puxo en marcha os paseos guiados «Redescubrindo Lugo», unha novidosa proposta pensada para gozar da provincia este verán. A primeira saída será a Piornedo, previsiblemente en xuño. Contará con paseo guiado, actividade de identificación de plantas medicinais, xantar no Chao das Penas, visita á Palloza-Museo Casa do Sesto, nova visita guiada e charla sobre as pallozas. As reservas poden facerse en guidoguiaturismo@gmail.com, por 13 euros (30 por un bono de tres xornadas) adquiríndoas antes do día 31, e 15 euros máis tarde.

Seguir leyendo

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Guido Álvarez, guía lucense: «O turismo de proximidade gañou moita relevancia»