As obras para mellorar a seguridade urbana adxudicáronse por un total de 30.200 euros
27 jul 2020 . Actualizado a las 19:36 h.O concelleiro de Mobilidade, Rubén Arroxo, informou onte da realización de 35 rebaixes nos acesos a pasos de peóns de toda a cidade. As obras para aliviar o desnivel e garantir unha maior seguridade na conexión entre a calzada e a aceira adxudicáronse por un total de 30.200 euros.
Segundo declarou o tamén tenente de alcalde, esta era «unha actuación necesaria para favorecer a accesibilidade», xa que permite eliminar barreiras arquitectónicas en distintos puntos da cidade de Lugo.
Arroxo informou de que «estanse a realizar rebaixes en rúas nas que ata o de agora non se realizara ningunha acción deste tipo».
Rúas por toda a cidade
En total están a efectuar 35 intervencións en pasos de peóns das rúas Cambria, Xulia Minguillón, Avenida da Coruña, Ramiro Rueda, Montero Ríos, Ronda das Fontiñas, Illas Canarias, Alfredo Brañas e Aquilino Iglesias Alvariño.
Rubén Arroxo afirmou que o goberno municipal traballa en distintos barrios da cidade, «en moitos casos en zonas nas que se levaba anos sen realizar ningunha actuación, mellorando a estética da zona e as condicións de vida da veciñanza».
