Coronavirus, cólera e memoria


Nestes estraños días que estamos a vivir, escóitase decote que esta situación nos cambiará e que aprenderemos a valorar o importante. Mais a historia demostra que, en realidade, superadas as situacións, tendemos a esquecelas. En 1854, A Coruña viviu un arrepiante brote de cólera que supuxo un elevadísimo número de mortes. Sábese como comezou todo e cal foi o caso cero da epidemia. A tripulación dun barco con cólera debía gardar corentena; mais un dos seus tripulantes, movido por un desexo incontible de ver aos seus, escapou onda eles. O seu acto, aparentemente sinxelo (e ata emotivo), acabou por provocar a morte de parte da súa familia e de miles e miles de coruñeses. A traxedia foi tan grande que chegou a prohibirse que as campás tocasen a morto para evitar o pánico. Houbo días nos que morreron ata 150 persoas nunha cidade que era moito máis pequena do que é na actualidade. Estímase que o cólera acabou con entre un dez por cento e un terzo da poboación.

Juana de Vega, personalidade fascinante daqueles anos, tivo unha acción destacada no coidado dos doentes, chegando a gañar fama de santa por deambular entre eles sen contraer a enfermidade. Ao parecer, padecera xa o cólera e quedara inmunizada, mais iso non resta fermosura ao seu esforzo. Esta é unha historia case esquecida que cómpre lembrarmos estes días, cando nos pese o confinamento da corentena; cómpre lembrar a ese home que, seguramente movido polo amor, causou a devastación. E tamén a Juana de Vega, como exemplo de xenerosidade e entrega. Toda situación límite deixa pegadas das distintas facetas humanas: a ruindade, a xenerosidade, a sabedoría, a inconsciencia... Cómpre lembrarmos o cólera: tamén foi a nosa istoria e merece un lugar na nosa memoria. E cando isto pase, non esquezamos o coronavirus e o que nos ensinou.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

Coronavirus, cólera e memoria