«Foi moi especial traballar dentro do proxecto do Pórtico da Gloria»

A restauradora cre que en Galicia se avanzou na valorización do patrimonio


Lugo / La Voz

A Uxía Aguiar (Cospeito, 1982) a paixón pola arte e a historia levouna a cursar estudos de Belas Artes en Compostela. Pero foi durante unha estancia de Erasmus en Roma onde se decatou de que o que realmente a atraía era a técnica, ver como estaban feitas e proxectadas as obras. Máis que a propia estética. Así que rematou os estudos e marchou a Asturias a cursar Restauración. Hoxe é a alma de Parteluz, unha empresa de restauración lucense que traballa tanto con grandes organismos coma con particulares e que xa ten no seu currículo proxectos como a restauración do Pórtico da Gloria.

-Que é Parteluz?

-Parteluz é unha empresa de conservación e restauración de bens culturais que ten dúas vertentes. Por un lado desenrolamos proxectos vinculados a bens patrimoniais, como por exemplo edificacións con valor histórico-artístico, fachadas, pinturas murais, pinturas vinculadas á arquitectura, retablos de gran tamaño ou xacementos arqueolóxicos que esixen saír do estudo para restaurar. E por outro lado facemos restauración de bens mobles, transportables, que xeralmente se fan no taller. Aquí restauramos pintura de cabalete, escultura policromada, retablos máis pequenos que necesitan unha desmontaxe….

-Cal é o proxecto no que máis ilusión lle fixo traballar?

-Cada un ten o seu atractivo, enseguida te namoras de todos. Foi moi especial cando traballei dentro do proxecto do Pórtico da Gloria. Era moi interesante porque había moitas empresas de índole científica e de restauración. Parteluz fixo os preparativos para que despois chegaran os do Instituto de patrimonio español para facer a reparación das esculturas. E dentro dese proceso, eu fixen un asesoramento cunhas formulacións de morteiro. Foi moi interesante porque era primeiro nivel, había moito presuposto para facer probas. A parte científica da restauración é importantísima, pero como quizais non é a máis lucida, queda un pouco de lado e normalmente non hai tantos recursos para analizar mostras.

-Cal é o traballo que lembra con máis agarimo en Lugo?

-A catedral. As pinturas que están na catedral son barrocas pero estaban moi ocultas porque antigamente a iluminación era a través de velas, cirios e había incensos. Eses fumes subían para arriba, nas bóvedas había filtracións de auga, e ese estrato húmido coas resinas crearon unha película moi negra e non se vía nada. Montouse a andamiaxe, eramos trece restauradores e estabamos aplicando o tratamento de limpeza formulado. Cando empezabas a retirar aparecían figuras, de repente, ¡Un San Froilán! Era emocionante.

-Agora, en exterior, o seu gran proxecto está en Sobrado.

-Traballamos para unha empresa contratista encargada de restaurar integramente todo o edificio, e nós temos a parte de restauración da pedra, todas as fachadas. Son moitos metros. Comezamos pola fachada principal en decembro, pasando frío e mollándonos. É un traballo moi duro e ás veces ata épico, porque loitas coas inclemencias do tempo, ou traballas no interior en templos moi fríos e húmidos. É unha profesión que non está valorada.

-Cre que hai máis conciencia na sociedade do valor patrimonial?

-Si, e a iso axudaron moito tanto a lei de patrimonio cultural do ano 85 como a nova do 2016 porque non se pode tocar nada sen solicitar unha petición. Se se trata de arte sacro, á diocese correspondente e tamén á Xunta, e se non, á Xunta só. Iso calou un montón en todas as capas, en calquera parroquia os veciños lémbranche os permisos. Casos como o do Ecce Homo de Borja en Galicia xa non pasa tanto, non hai tantos repintadores.

 -Pero algún segue a haber?

-Todos os santos están repintados. O típico en Galicia no rural era que chegaba a festa e limpaban a igrexa e adecentaban os santos ou o que fora, todos están repintados. Pero ultimamente chaman aos restauradores. Hai máis conciencia.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

«Foi moi especial traballar dentro do proxecto do Pórtico da Gloria»