O BNG reclamou onte do Concello de Lugo que se atenda, con mantemento ordinario, todos aqueles elementos de xestión municipal que se atopan inutilizados ou con deficiente funcionamento. Rubén Arroxo sinalou que «o Concello de Lugo precisa ter a alguén que se preocupe de certas cousas coas que tropezamos todos os días e vemos como seguen sen funcionar. Os colectores de lixo da praza da Soidade, a fonte do Carril dos Fornos ou a iluminación do convento de Santo Domingo poderían funcionar e dar outra imaxe de Lugo», dixo o portavoz nacionalista.
Arroxo sinalou que «foron moitos os fondos públicos que se gastaron en implantar estes elementos no centro da cidade, pero non se fixo mantemento dos mesmos e agora están inactivos e dando unha mala imaxe da cidade». O voceiro do BNG, e candidato á alcaldía, explicou que «o Concello conta cos medios para atender estas pequenas infraestruturas, pero non hai decisión política para facelo. Estamos recibindo suxestións de moita xente a través da nova aplicación do BNG, na que nos formulan melloras para a cidade que son totalmente asumibles» explicou Rubén Arroxo, e explicou que «a pasada semana puxemos a funcionar unha aplicación para dispositivos móbiles que a veciñanza de Lugo xa está a utilizar para facernos chegar queixas e propostas sobre a nosa cidade». Arroxo anunciou unha campaña para promocionar a utilización das redes sociais e a aplicación para móbiles do BNG de cara a «facer que Lugo funcione», dixo o voceiro do BNG no Concello de Lugo.