Bieito Romero, líder de Luar na Lubre: «O público dinos que levamos maxia nos concertos»

A banda folk presenta o venres 14 en Lugo o seu novo disco, «Ribeira Sacra», con artistas convidados e performances


Bieito Romero lidera Luar na Lubre, unha das bandas de referencia da música folk do país, que ofrece un concerto o venres 14 en Lugo (Auditorio Gustavo Freire, 21.00 horas. Entradas desde 15 euros en ataquilla.com), no que presentarán o seu último disco, Ribeira Sacra. Este traballo foi gravado entre o 2017 e o 2018 no Mosteiro de San Pedro de Rocas (Esgos, Ourense), para poñer en valor, a través da música, a riqueza histórica, etnográfica, natural e monumental da Ribeira Sacra. O traballo recolle sons naturais, música tradicional, letras sobre feitos, personaxes históricos e lendas, textos na linguaxe dos afiadores (o barrallete)... e a colaboración de artistas como Víctor Manuel, Sés, a Coral de Ruada, Nani García, Brais Maceiras...

-Como será o concerto de Lugo?

-Será un concerto máis dentro da xira de presentación de Ribeira Sacra en Galicia, polo tanto, haberá artistas convidados, como Sés, Óscar Rosende, de Brothers in Band, Irene Cerqueiro, Bieito Romero (o meu fillo)... e tamén contaremos cunha performance a cargo do afiador Santiago Bonay e do alfareiro Agustín Vázquez. Ofreceremos temas do último traballo e combinarémolos cos clásicos de Luar na Lubre.

-Que ten de especial este último disco?

-É un disco conceptual, acerca dunha zona sobre a que non se fixera nada. A idea inicial era facelo sobre toda a Ribeira Sacra, pero son 23 concellos con moito material, así que nos centramos só na parte de Ourense. O traballo foi moi laborioso porque non había referencias bibliográficas, todo o recollemos nós, os sons, as letras... No disco contamos con numerosas colaboracións doutros artistas. Ademais, incorporamos algo novidoso: as sonoridades do lugar.

-E a que soa a Ribeira Sacra?

-Cada zona ten a súa sonoridade propia, que inclúe os sons da natureza e o factor humano. No cedé incluímos, ademais dos temas musicais, gravacións de campo sobre os sons da Ribeira Sacra: o son do carro tradicional, un amencer, os Felos de Maceda e Esgos, o afiador, as campás... De forma que un se poida ubicar na Ribeira Sacra. Ata gravamos en Esgos o son das campás a ritmo de muiñeira.

-E como se transmite todo iso nun concerto?

-Transmitir todo ese traballo de campo é complicado, pero nun concerto é máis fácil ca no disco, porque no disco non hai palabra, xoga un papel máis importante a imaxinación, pero no concerto si que hai palabra e iso facilita as cousas. O que facemos é intercalar sons entre os temas que tocamos e tamén por iso traemos ao alfareiro e ao afiador.

-Como está sendo a acollida deste último traballo?

-Marabillosa. Levamos corenta concertos desde que saíu o disco en xuño, e todo está indo moi ben, tanto en Galicia como fóra. É certo que precisamente ás veces é en Galicia onde non somos tan receptivos ao propio e descoñecemos o que temos, pero non é así neste caso, estamos enchendo. E fóra de Galicia igual, non custa traballo transmitilo e dinnos que parece que lles levamos maxia nos concertos. Este traballo ten longo percorrido e sentímonos moi cómodos con el.

-Haberá segunda parte sobre a Ribeira Sacra de Lugo?

-É algo pendente que faremos, a fondo, aínda que non inmediatamente.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Bieito Romero, líder de Luar na Lubre: «O público dinos que levamos maxia nos concertos»