Justo Beramendi destaca que foi «o nacemento do nacionalismo»


Hai tres semanas, o historiador e catedrático da USC Justo Beramendi impartía unha conferencia en Lugo invitado polo Ateneo Galeguista para falar daquela data histórica. Destacou o contexto no que se celebrou aquela asemblea, cando o nacionalismo catalán mantiña un conflito contra o centralismo, e nacía así a Mancomunitat (1914). «Nese intre o nacionalismo galego estaba a velas vir», dixo Beramendi, ata que nacen as Irmandades da Fala (1916), que recolleu diversas tendencias: republicanos, agraristas, rexionalistas, católicos... «un universo heteroxéneo influenciado polos nacionalismos periféricos».

Como explicou un dos fundadores do Museo do Pobo Galego, este movemento ía máis alá de promover a fala ou o folclore galego, e quería ter unha base política, aínda que con pouco éxito electoral. Sería no verán de 1918, dixo Beramendi, cando chegou o primeiro paso para poñer orde nas Irmandades, e puxo de manifesto a importancia que tivo Vicente Risco, que acababa de publica Teoría do Nacionalismo Galego, para posicionarse de maneira máis clara; iso si, afirmou, á custa de marcharen os católicos e os rexionalistas, que montaron o Centro Regionalista.

É neste contexto cando se decide facer a Asemblea Nacionalista de Lugo, que prepara Lois Porteiro, que morre o 27 de outono. A asemblea, explicou Beramendi, centrouse na organización e na redacción do programa nacionalista. Lembrou que participaron as figuras destacadas do momento e do futuro do nacionalismo. Sinalou que foi o nacemento do nacionalismo galego, polo menos de xeito organizado e cuns conceptos ideolóxicos claros, especialmente o de Galicia como nación, que España é un estado de nacións que deberían entenderse e que Galicia tiña dereito á súa autonomía, con competencias propias, como as fiscais, administrativas, industriais, agrarias, educativas ou sociais, entre outras. A proposta de federación tería atribucións en moeda, relacións exteriores, dereitos fundamentais e forzas armadas.

Beramendi dixo que, como corrente política, a asemblea de Lugo foi un fracaso polo seu escaso arraigo ata 1930, pero si foi o embrión do Partido Galeguista, que nace a finais de 1931, e que tería máis calado, chegando ao seu punto máis álxido co referendo de aprobación do Estatuto de 1936, «primeira expresión oficial de autonomía para Galicia».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Justo Beramendi destaca que foi «o nacemento do nacionalismo»