Mercedes Novo falará hoxe na primeira xornada do III Divulga Terra, que continuará os días 22 e 29. O obxectivo desta iniciativa do Campus Terra de Lugo é dar relevancia pública ao traballo dos investigadores lucenses e promover o uso do galego como ferramenta para comunicar os resultados destes traballos. Ademais, este ano o evento aspira a poñer o foco nas mulleres científicas que cada día desenvolven a súa actividade no Campus.
-Que importancia teñen iniciativas como o Divulga Terra?
-É moi interesante porque o Campus de Lugo en xeral e a investigación que se fai é moi descoñecida, e é importante que se dea a coñecer, entre outras cousas, porque está feita con diñeiro público.
-Este ano as mulleres investigadoras son protagonistas.
-Si, hai que destacar o papel da muller. Somos case maioría na investigación, tanto no Campus de Lugo como en España en xeral. O número de alumnas é maior en todos os ámbitos. Porén, cando imos a niveis máis altos, como cátedras ou dirección de proxectos, hai menos mulleres. É importante visualizar que estamos aí, que as mulleres somos parte importante da investigación e promocionar que sexamos o 50 %.