O Campus de Lugo lidera un proxecto autonómico para loitar contra os lumes

A USC impulsa a investigación para sensibilizar á sociedade, mellorar as prácticas de extinción e recuperar os solos e a vexetación tralos incendios


O Campus de Lugo lidera un proxecto autonómico para previr e mitigar os efectos dos lumes. A USC, en colaboración coa Xunta de Galicia, impulsa o programa pioneiro «Plantando cara ó lume», que busca a transferencia de coñecementos e de resultados de investigación para avanzar na sensibilización social contra os lumes e tamén na mellora da capacitación e formación práctica para loitar contra os incendios e para a posterior recuperación de solos e da vexetación asolada polas lapas.

«Plantando cara ó lume» é unha iniciativa xurdida no Campus Terra da USC, baixo a coordinación do profesor do departamento de Edafoloxía e Química Agrícola Agustín Merino. Na súa primeira andaina, este proxecto implicou a diversos investigadores da Escola Politécnica Superior de Enxeñaría e da facultade de Formación do Profesorado de Lugo, ademais do Centro de Investigacións Forestais de Lourizán, dependente da Xunta de Galicia, así como a estudantes universitarios que, tras un período de formación previa, trasladaron logo experiencias, proxectos e coñecementos a centros escolares e responsables de comunidades de montes.

A fonda sensibilidade xerada polos múltiples danos persoais, económicos e ambientais provocados polos incendios forestais no territorio, unida á crecente preocupación por «dar resposta e buscar solución a un problema estrutural da sociedade», en palabras de Merino, redobra os recursos do proxecto, ao que este ano se incorporan investigadores das facultades de Bioloxía, Económicas e Ciencias da Comunicación, ademais de todos aqueles estudantes interesados en participar nesta sorte de voluntariado universitario.

A vaga de lumes  rexistrada nos últimos días en Galicia causou xa efectos dramáticos, pero a súas consecuencias medioambientais, segundo explican desde a USC, poden acentuarse nos vindeiros meses por mor da extensa superficie asolada polas lapas e, sobre todo, a causa dos efectos da erosión dos solos coa chegada do inverno e das choivas.

Ante esta situación, Merino entende que «Plantando cara ó lume» constitúe unha iniciativa aberta á participación de todas as persoas, a través da que os seus promotores tratan de dar a coñecer a todos os estamentos da sociedade, desde os escolares ata os propietarios e xestores de comunidades de montes, os posibles efectos dos incendios no territorio, ademais de propoñer solucións para minimizar os riscos, así como para rehabilitar os solos e a vexetación das áreas afectadas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

O Campus de Lugo lidera un proxecto autonómico para loitar contra os lumes