A xeración «selfie» escoitou con devoción a unha lenda viva chamada Neira Vilas

O autor de «Memorias dun neno labrego» reflexionou no IES Leira Pulpeiro sobre a vida, Galicia, o galego e a emigración


lugo / la voz

«Tedes diante de vós a unha lenda da literatura galega». Con estas palabras introduciu onte o director do IES Leiras Pulpeiro de Lugo, Íñigo Barreira, a charla que ofreceu no centro Xosé Neira Vilas (Gres, Vila de Cruces, 1928). «É unha ledicia e un privilexio telo aquí, e non só polo seu valor literario, senón tamén polo humano», engadiu sobre o autor de clásicos como Memorias dun neno labrego, Cartas a Lelo, O cabaliño de buxo ou Historias de emigrantes. Máis de cen alumnos de primeiro e segundo de Bacharelato escoitaron con devoción un relato que Neira Vilas iniciou recordando a súa infancia como «fillo de campesiños pobres» que se erguía ás tres da mañá para traballar e, xa de día, «gañaba o dereito de ir á escola despois de andar 14 quilómetros». «Con 20 anos termino emigrando para ter libros e estudar», destacou o escritor, que é membro da Real Academia Galega.

En torno á experiencia da emigración, primeiro en Bos Aires e logo en Cuba, fiou Neira Vilas multitude de anécdotas e reflexións sobre a vida, a identidade de Galicia e o idioma galego. «Castelao dixo que o galego é fillo do latín, irmán do castelán e pai do portugués, e segue sendo un privilexio que temos», destacou o escritor, que con 86 anos conserva unha lucidez envexable aínda que se move con maior dificultade. Ao final, varios rapaces non quixeron deixar pasar a ocasión sen facerse un selfie con Neira Vilas, que aceptou encantado logo de firmar cantidade de libros. Tamén interviñeron a profesora e membro do equipo de Dinamización Lingüística Juncal Martínez; e a coordinadora da biblioteca, Ana Dopazo.

«Invítovos a usar e a falar o galego entre vós. E sobre todo a ler, porque o libro, sexa en papel ou sexa electrónico, segue sendo un medio fundamental de adquirir cultura. Nel temos toda a ciencia e toda a sabiduría do mundo»Xosé Neira Vilas

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos

A xeración «selfie» escoitou con devoción a unha lenda viva chamada Neira Vilas