Dous dos tres equipos do club vilagarcián completaron a Liga da Terceira División con sendos ascensos
19 mar 2014 . Actualizado a las 07:00 h.A novena rolda das Ligas Galegas de Xadrez aproximou o primeiro plantel do Club Xadrez Fontecarmoa, o Interrías Sanxenxo, un pouco máis ao que sería o maior éxito da historia da entidade. O título da máxima categoría por clubs, a División de Honra, cuxa clasificación encabeza hoxe con 36,5 puntos. Un máis có Universidade de Vigo e 3,5 de vantaxe respecto ao Xadrez Ourense A.
O C.X.F. Viajes Interrías derrotou na antepenúltima rolda o Círculo das Artes A de Lugo, conxunto que pelexa pola permanencia xusto no primeiro posto, o noveno -de doce-, que evita o descenso. Pese á teórica diferenza entre ambos rivais, o Fontecarmoa non pasou dun 4-2, nun partido que para Julio Torrado e para Julio González supoñía enfrontarse ao seu ex equipo.
Máis aló da División de Honra, o C.X.F disfrutou do ascenso de dous dos seus tres equipos na derradeira xornada da Terceira F. O CXF Deportes Rodas foi campión cun 0-4 sobre o Breogán B, e o CXF A Goleta terceiro rematando cun 0-4 sobre o Viajes Barraña C. Ademais, o CXF Distribuciones Lete concluíu cuarto, vencendo 1,5-2,5 o Padrón C.
Outros resultados: Torpedo 3,5-0,5 CXF C. Xuventude, CXF B. Print 0,5-3,5 SAFA A, Padrón B 3-1 CXF McDonalds, e USC Xuvenil 2,5-1,5 Breogán A (2ªC); Ágora 2-2 CXF A. Pereira, CXF R. A Pedra 1-3 Portas, e Xadrez Dorna 1,5-2,5 Marín B (2ªD).