A Pobra de San Xillao acollerá hoxe a primeira xornada da primeira Festa da troita do Neira que organiza o Concello de Láncara. A partir das 18.30 horas, sete establecementos hostaleiros da localidade ofrecerán degustacións gratuítas deste peixe de río. O alcalde en funcións, o socialista Pablo Rivera Capón, encargarase de repartir persoalmente desde primeira hora da mañá uns 225 quilos de troitas entre os negocios involucrados na iniciativa. Ademais haberá música de charangas e un espectáculo de queimada ás doce. Trátase dunha cita pioneira para contribuír ao impulso dos negocios hostaleiros e promocionar os recursos de Láncara atraendo xente. A festa da troita terá continuidade o 4 de setembro en Láncara, Armea, Muro, Vilaleo, Reboleira e Cedrón.