Descubertas dúas novas mámoas con inscripcións en Friol duns 6.000 anos de antigüidade


lugo / la voz

O pasado mércores, os integrantes do Colectivo Patrimonio dos Ancares, Brais Rodríguez e Xabier Moure, localizaron dúas novas mámoas no Concello de Friol, concretamente nos montes da aldea das Penelas, en Anxeriz, nunha penichaira situada a 515 metros de altitude.

As mámoas teñen unhas medidas de 21 e 25 metros de diámetro e un metro e medio e dous metros de altura, respectivamente. A súa antigüidade achégase aos 6.000 anos. Unha das medorras está cuberta por fentos e xestas e sobre a outra medran carballos e un piñeiro.

A pouca distancia destes enterramentos atópase unha gran mámoa que conta cunhas medidas de vinte e cinco metros de diámetro e tres de altura e que xa foi catalogada por Patrimonio. Nas inmediacións, hai varios chantos da súa cámara funeraria. Debido á posición do sol, descubriron neles «varios símbolos gravados en forma de ondulacións», explican dende o Colectivo e engaden que «estas representacións interprétanse como correntes de auga, co devir sinuoso da vida, ou coa serpe que na relixiosidade primitiva tiñan un significado positivo. A serpe relaciónase coa fertilidade e tamén coa inmortalidade».

Os motivos achados son semellantes a outros que se descubriron nun esteo dunha mámoa do monte Vilaldar, na parroquia de Miraz.

Estas representacións conlevan a declaración das mesmas como Ben de Interese Cultural (BIC), o que lle outorga a máxima protección legal. Agora, o Servizo de Xestión Cultural da Xunta de Galicia debe proceder á súa catalogación.

«Friol pode considerarse como o concello de Galicia con máis patrimonio megalítico. Calculamos que puido haber uns 300», conclúen os membros do Colectivo Patrimonio dos Ancares.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

Descubertas dúas novas mámoas con inscripcións en Friol duns 6.000 anos de antigüidade