«Un alcalde ten que achegarse aos veciños e ser un máis entre eles»

José Ángel Santos anuncia que o obxectivo do seu labor municipal é colocar o concello de Friol no lugar que lle corresponde


Vilalba / la voz

Gañar con maioría absoluta non é doado, pero tampouco imposible. Gañar cunha maioría absolutísima na que se reúna o 81 % dos votos xa significa falar de palabras maiores. O alcalde de Friol, José Ángel Santos, acadouna o domingo pasado, con dez dos once concelleiros da corporación para o PP e un para o PSOE. Catro anos antes, na primeira convocatoria na que liderou a lista popular, conseguira oito.

-Esperaba un triunfo tan grande?

-Non. Cos resultados que se deron nas xerais intuíase que se podía sacar un concelleiro máis, pero non se pensaba nisto.

-Cal foi, na súa opinión, a clave do resultado?

-O traballo destes catro anos. O equipo de goberno que traballou foi un equipo unido, e a cohesión fixo que o traballo fose mellor. Fixéronse, creo, moitas cousas por Friol. Traballo, humildade, honestidade, esforzo...: o noso propósito é poñer a Friol no sitio que merece.

-Friol é un concello rural, con poboación máis ben espallada. Supón iso un maior esforzo para contactar cos veciños?

-O esforzo é maiúsculo. Somos un concello de 296 quilómetros cadrados, con 281 núcleos de poboación ademais das aldeas illadas. Non é doado chegar aos veciños, pero si se chegou. Hai que falar, escoitar as necesidades e levalas a cabo, ademais de desenvolver os proxectos que ti creas convenientes.

-Foron os resultados do domingo un premio a esa proximidade ou un premio á xestión destes catro anos?

-Tes que achegarte aos veciños, ser un máis entre eles. Unha maioría decidiu premiar a xestión destes catro anos. Vas pola rúa, falas coa xente e explícaslles os teus puntos de vista... Hai tamén unha xestión. Houbo un apoio decidido ao sector empresarial, co polígono, e ao primario, coas axudas ás permutas ou coa bonificación do IBI; pero non se poden esquecer os maiores nin a xuventude. Levando a cabo esas medidas, as necesidades están máis ou menos cubertas. Creo que o domingo pasado os veciños o souberon ver dunha maneira esmagadora, e os resultados así o indicaron.

-De quen é o éxito: seu, do grupo, do partido...?

-É un éxito do equipo que houbo nestes catro anos e do equipo que se presentaba agora. Os veciños viron que era unha candidatura idónea. É un éxito da candidatura anterior e da entrante, pero tamén dos colaboradores: temos un equipo cohesionado, en forma de pirámide, coñecedor das necesidades.

-Vese fóra de Friol, ocupando outro cargo?

-Non. Estou en política por Friol, e a miña prioridade é facelo o mellor posible nestes catro anos, chegar a todos os recunchos do concello con medidas e dar resposta a ese apoio maioritario.

-Tivo unha polémica co conselleiro de Política Social [pediu a súa dimisión en marzo do ano pasado considerando que non atendía as necesidades do municipio]. Volvería facer o mesmo?

-Mentres sexa alcalde, sempre poñerei as necesidades e os intereses de calquera veciño por enriba de calquera sigla. Creo que a xente soubo recoñecer ese labor e sabe que non me treme o pulso diante dun cargo sempre que defenda os intereses do Concello.

-Vese como un exemplo polos resultados que obtivo?

-Non. Cada concello é un mundo. Non son un exemplo para ninguén; tento facelo o mellor posible.

«Se hai poboación, hai movemento económico»

Santos afirma que un dos seus principais obxectivos nestes catro anos será a loita por acadar a chegada de empresas. Explica que se hai apoio ao tecido empresarial poderán crearse postos de traballo, co que iso implica: «Se hai poboación, hai movemento económico», di o alcalde, que tampouco esquece a necesidade de ocuparse da xente nova e da de máis idade. A construción da residencia, engade, terá que ser axiña unha realidade.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

«Un alcalde ten que achegarse aos veciños e ser un máis entre eles»