Localizados seis castros en Baleira e Castroverde

la voz LUGO

CASTROVERDE

PATRIMONIO DOS ANCARES

Non estaban catalogados e algúns atópanse en bo estado de conservación

16 may 2020 . Actualizado a las 13:34 h.

A colaboración entre os colectivos Patrimonio dos Ancares e Mariña Patrimonio permitiu documentar nesta semana seis novos castros na parte oriental da provincia de Lugo, dous no concello de Baleira e catro no de Castroverde. Segundo explica o historiador Xabier Moure, non figuran recollidos nin no Plan Básico Autonómico da Xunta de Galicia nin nos PXOM.

«Resulta chamativo que a pesar de ser tan evidentes no terreo e que nos seis casos conserven, incluso no Catastro, os evocativos topónimos de O Castro ou de A Croa, estean sen catalogar, ademais de que os veciños cos que falamos os identifican claramente», sinala Moure.

Os castros do concello de Baleira atópanse na aldea de A Espiña, parroquia de Cubilledo, e na aldea de As Salgueiras, parroquia de Martín. Teñen unhas dimensións de 75 por 55 metros, e de 70 por 65 metros, respectivamente.