«Non estamos cumprindo as nosas expectativas iniciais»

O equipo da Carqueixa está quinto, pero o técnico admite que agardaba algo máis


monforte / la voz

Juan Diéguez cumpre a súa terceira temporada no Río Sil. O preparador monfortino recoñece que non está sendo un bo campionato, circunstancia que achaca a praga de lesións que leva asolando ao equipo dende que comezou a liga. A pesar das adversidades, Diéguez subliña que o principal obxectivo do equipo da Carqueixa é disputar a fase de ascenso.

-¿Que lectura fai da temporada e da quinta praza que ocupa o seu equipo actualmente?

-O que teño que dicir é que non estamos cumprindo as expectativas iniciais que tiñamos, pero a culpa desta situación está na falla de continuidade. A cantidade de lesións longas que tivemos penalizáronnos moito, o que nos impediu estar arriba nunha das dúas primeiras prazas.

-¿Manteñen o mesmo obxectivo do comezo do campionato?

-A estas alturas da temporada e tal e como estamos, o obxectivo do Río Sil é clasificarse para a promoción de ascenso. Iso é innegociable. Imos facer todo o posible por estar aí arriba.

-¿Supón iso renunciar a loitar por unha das dúas primeiras prazas, que permiten o ascenso directo?

-Non, pero alcanzar unha delas entendo que é inviable, porque dadas as circunstancias que atravesamos non temos ritmo de competición para estar nas posicións de ascenso directo.

-¿Gústalle tal e como está estruturada a competición da Terceira Autonómica?

-Non me gusta para nada. Cando se retiraron os equipos que deixaron de competir, os organizadores do campionato deberon sortear de novo o calendario, porque desta maneira hai moitos paróns, e iso inflúe na traxectoria dos equipos. A Federación Galega de Fútbol está matando a Terceira Autonómica, porque non se preocupa para nada por ela. Isto acaba minando a futbolistas, adestradores e directivos. Vexo que os xogadores están queimados con este sistema.

-¿Cal sería a súa proposta?

-Tendo en conta o número de equipos que somos, agora deberíamos descansar, porque os campos están como están, e rematar máis tarde.

-¿Merece o Río Sil estar na Segunda Autonómica?

-Si, sobre todo polo traballo que fai esta magnífica xunta directiva. Espero que se repita a imaxe da fase de ascenso de hai dúas temporadas, na que tomou protagonismo a marea verde. Aínda recordo os dous autobuses cheos de afeccionados que nos acompañaron nos desprazamentos. Imos entregarnos ao máximo por conseguir ascender.

-¿Como están as instalacións da Carqueixa?

-Mal. O alcalde de Sober prometeu que teriamos vestiarios novos ao comezar a temporada, pero xa comezou a segunda entrega e continuamos cos mesmos. O Río Sil non se esquece das promesas.

-¿Como se presenta o partido ante o Castroverde?

-Aínda que fomos un dos poucos equipos que lles gañou no seu campo, considero que será un partido complicado. Sabemos o que nos xogamos, porque se gañamos colocarémonos cuartos. O problema é que este ano a Carqueixa está sendo a nosa materia pendente por todas as adversidades que temos. Nós sairemos polos tres puntos en xogo para achegarnos ao obxectivo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

«Non estamos cumprindo as nosas expectativas iniciais»