A asociación Rente ao Couce recuperou fai seis anos a celebración na honra a este santo, que ten lugar na Pena do Pico e se completa cunha rapa de bestas. Celébrase os días 7 e 8 de agosto
03 ago 2026 . Actualizado a las 19:15 h.Ata finais dos anos 80, era costume celebrar en Becerreá o San Lourenzo. Na Pena do Pico, organizábase unha romaría que reunía a moita xente de concellos limítrofes, que gozaban con misa —moitas veces na capela de Santa María do San Lourenzo, en Penamaior—, música e un xantar campestre. Tras aqueles tempos a celebración perdeuse, e fai seis anos que a asociación Rente ao Couce decidiu recuperala, adaptándose aos tempos e introducindo novidades.
O evento, que se aglutina en dous días, comeza o venres 7 cunha subida a Pena do Pico, ás 20.00 horas. Partirá do centro social de Becerreá, e poderá facerse correndo, en bicicleta, camiñando ou a cabalo. Son uns 8 quilómetros que transcorren entre a plena natureza de Os Ancares. De feito, un dos obxectivos da celebración é, precisamente, poñer en valor o patrimonio natural da zona. Na meta haberá, segundo explican, entrega de trofeos, foliada e petiscos. Este ano dende a agrupación optaron pola andaina fronte á tradicional romaría, unha decisión que se enmarca nese obxectivo de ir transformando e adaptando o evento.
Rapa de bestas
Ademais, a subida á Pena do Pico complétase ao día seguinte con misa, vermú e cunha rapa de bestas, que ten unha traxectoria de catro anos. Conta Elba Cordero Gómez, unha das organizadoras, pertencente a agrupación Seara Verde, que a rapa comezou sendo algo particular, que a súa familia facía na casa porque ao ter cabalos necesitaban pasar por esa tarefa. No obstante, un coñecido propúxolles facela na Pena do Pico —onde se celebra agora— ata o punto de abrila ao público para que poida gozar e coñecer esta tradición, que non é común en Os Ancares.
A decisión de xuntala coa celebración do San Lourenzo —a rapa será ao día seguinte, o sábado 8— foi motivada pola combinación de esforzos e o intento de que se achegue o maior número de persoas posible. Conta Elba que son sobre 30 os cabalos de Pura Raza Galega que se xuntan para desparasitar no curro, e que o evento ten cada vez máis acollida. «É algo que temos que facer si ou si ao ter estes animais, pero gústanos que veña a xente e por iso decidimos abrila ao público».
A rapa terá lugar o sábado día 8 tamén na Pena do Pico. Pero a xornada comezará cunha misa ás 12.00 horas, para seguir con sesión vermú e foliada ás 12.30. A mañá finaliza cun xantar ás 14.00 horas e a rapa prográmase para pola tarde, ás 16.00 horas. No evento colaboran, ademais de Rente ao Couce e Seara Verde, a Deputación de Lugo e o Concello de Becerreá.