Miguel González, alcalde de Baralla: «A festa é unha ocasión para unirse e facer pobo»
BARALLA
A celebración do San Vitorio continúa ata o domingo
27 ago 2022 . Actualizado a las 05:00 h.O concello de Baralla está inmerso estes días en plenas festas do San Vitorio, que se retoman despois do parón pola pandemia. As ganas que había de recuperar esta festividade é patente no éxito que está tendo a programación e na resposta dos veciños. O alcalde, Miguel González, convida a todo o mundo a gozar desta celebración, que segue hoxe e mañá.
—Que tal están indo as festas?
—Pois moi ben. Comezamos a fin de semana pasada coa romaría campestre e as clásicas merendas e foi un día moi bonito, con moitísimas familias e moita xente de fóra que se reencontrou con amigos e familiares. Estas festas son unha ocasión para unirse e facer pobo. Ademais, había moitas ganas de celebralas, porque levamos desde o 2019 sen facelas debido á pandemia.
—Que novidades hai no programa deste ano?
—É similar ao de anos anteriores. Ademais das merendas, agora temos venres [por onte], sábado e domingo de celebracións, con verbenas, pasarrúas, charangas, espectáculos de maxia, xogos para nenos... De feito, para os máis pequenos levamos ofrecendo alternativas todo o verán á marxe das festas. Hai uns días, por exemplo, tivemos unha xornada de colchonetas de auga.
—Canta xente esperan para estes días en Baralla?
—Moita, porque había ganas de retomar as festas e ademais temos sorte co tempo, que vén bo para estes días. O domingo rematamos as festas coa actuación da orquestra Panorama e o luns 29 é festivo en Baralla, así que a xente pode repoñer forzas despois dos festexos.
—Que outras celebracións terá Baralla no que queda de verán?
—A próxima será o Trail Vía Künig, que terá lugar o 11 de setembro. [Haberá andaina (10 quilómetros), categoría infantil (de 800 metros a dous quilómetros), e competicións de 10, 20 ou 30 quilómetros. As inscricións poden facerse ata o día 7 en ccnorte.com].
