Vito Valiño, carniceiro no rural de Lugo: «Abro o negocio todos os domingos e festivos, as miñas últimas vacacións foron hai 15 anos»
BALEIRA
O supermercado familiar Valiño leva máis de vinte anos dando servizo á poboación da montaña e aos peregrinos durante todos os días do ano, ininterrumpidamente
11 abr 2023 . Actualizado a las 20:09 h.Situado ao oeste da provincia de Lugo está O Cádavo, capital do municipio de Baleira, e alí mesmo, en fronte da gasolineira, está o supermercado Valiño, pertencente ao grupo Claudio, un negocio familiar que rara vez toma vacacións, xa que o local abre de luns a domingo, con festivos incluídos, dende hai máis de vinte anos.
Vito Valiño, o dono do supermercado, asegura que para el non hai distinción entre un luns e un domingo, que todos os días hai traballo, porque é a única alternativa para sacar adiante un negocio coma este nunha localidade que conta con apenas 150 habitantes.
«As miñas últimas vacacións foron hai quince anos a México coa miña muller. Dende aquela non recordo un día libre», di Vito, que traballa xunto á súa muller Mari Carmen Lorenzo, o seu fillo Sergio Valiño e a súa cuñada Remedios Lorenzo.
Supermercados Valiño ten de todo na súa tenda, dende produtos lácteos, verduras, froitas, embutidos, conservas, e carne, o seu produto estrela: a carne. «A maioría dos nosos clientes habituais son de Becerreá, Baralla, A Fonsagrada e Castroverde, ademais do Cádavo, e adoitan vir pola carne, que é a nosa especialidade», di Vito.
Venden 150 becerros en carne ao ano
E é que eles traen a carne da pequena empresa barallense Folgueiras Fernández, que vende produtos cárnicos ao por menor, e que, segundo asegura o dono do supermercado, son de moi boa calidade. «Nós vendemos ao final uns 150 becerros ao ano, e tamén ofrecemos moitos produtos para as matanzas. Hai que adaptarse ás necesidades da xente, e aquí cómese ben», afirma.
Vito cre que a clave do éxito está no bo produto que ofertan, pero asegura que o horario tamén xoga unha parte clave. «Para sobrevivir en sitios tan pequenos coma este hai que traballar moito a diario. Nós non escatimamos en horas», asegura. E é que a súa tenda abre de luns a sábado de 09.00 a 14.30 e de 16.30 a 20.30 horas, e domingos e festivos de 09.30 a 13.30 horas.
Prensa, estanco e produtos para peregrinos
Ademais da súa carnicería e do resto de produtos alimentarios, o negocio dos Valiño tamén vende prensa diaria, revistas, servizo de estanco, o único en todo o Cádavo, e mesmo produtos para os peregrinos, como chuvasqueiros, gorros, luvas ou paraugas, entre outros, xa que por alí pasa o Camiño Primitivo ata Santiago de Compostela, polo que é parada obrigada para moitos dos camiñantes. «Este é un lugar de paso para moitos peregrinos, que tamén forman unha parte importante das nosas vendas», asegura o propietario.
Vito, que leva case toda a vida no Cádavo, asegura que a vila vai cada vez a menos, e que a poboación descende paulatinamente. Pero el asegura que, unha das ferramentas necesarias para manter vivas as pequenas poboacións de interior é ofrecer servizos básicos. «Se rematamos co comercio local, as vilas acaban morrendo. Por iso hai que adaptarse ao que demanda a xente», sostén.
Agora, con 63 anos, tanto Vito como a súa muller Mari Carmen xa miran máis de preto a xubilación, pero aínda auguran Valiño para rato. «O noso fillo seguirá co supermercado cando o deixemos, e, de seguir así, eu aínda lle vexo futuro», asegura Vito.
Baralla e Palas tamén se uniron aos domingos
Ademais do Cádavo, a pouquiños quilómetros de alí, o Merca Más de Baralla, rexentado dende hai dous anos pola Pastelería Baralla Sabor, tamén decidiu abrir o negocio os domingos pola mañá porque «hai máis xente de paso», segundo afirma Ángeles Méndez, a dona da pastelería.
Asimesmo, en Palas de Rei o Covirán tamén abre os domingos para dar servizo aos peregrinos, que pasan a diario pola vila lucense. Unha moda á que cada día se unen máis tendas locais co obxectivo de competir coas grandes marcas e seguir en pé.
