O Terras de Burón busca fomentar o turismo activo e aproveitar os recursos naturais e patrimoniais da zona. A asociación, cuxa directiva está formada só por mulleres, fará unha ruta o día 12
21 nov 2021 . Actualizado a las 05:00 h.Os amantes da montaña, da natureza e do deporte teñen dende agora un novo centro de referencia: o Club de Montaña Terras de Burón, a primeira agrupación deste tipo que nace na zona da Fonsagrada. Os seus impulsores son un grupo de veciños da comarca, afeccionados á montaña, que buscan fomentar o turismo activo e aproveitar os recursos naturais e patrimoniais da zona, ademais de ofrecer unha alternativa próxima aos amantes da montaña, xa que ata agora o club que estaba máis cerca encontrábase en Mondoñedo.
Lara Cancio, a secretaria dun club cuxa directiva está formada exclusivamente por mulleres, explica que hai moitos recursos sen explotar no concello: montañas, seimeiras, rutas de sendeirismo..., que son un gran reclamo turístico. Promover estes recursos busca tamén favorecer o seu coidado, posta a punto e evitar o abandono. Pero non só iso; os impulsores tamén viron que existía un baleiro no mundo do montañismo: «Os amantes do deporte e da montaña tiñamos que estar en clubs de Ourense, de Mondoñedo, da Coruña... non había nada por aquí. Ademais, vimos que coa pandemia medrou o interese por este tipo de actividades ao aire libre e no rural», explica Cancio.
O seu obxectivo é organizar rutas de sendeirismo, trail running, bicicleta de montaña (BTT), escalada, barranquismo, espeleoloxía...
Rocódromo e charlas
Como sede dispoñen da Aula Verde, un local que lles cedeu o Concello da Fonsagrada, ao que están moi agradecidos, que consta de dous edificios e que utilizarán como centro de actividades: colocarán paneis informativos sobre as rutas, instalarán un rocódromo de iniciación, darán charlas, servirá como punto de encontro e de inicio das rutas... e tamén contará con servizo de consigna, ducha, vestiario, instalacións para o lavado de bicicletas...
«A idea é que os visitantes veñan facer as nosas rutas e teñan un lugar onde deixar as súas pertenzas e ducharse ao finalizar», explican.
Primeira ruta o día 12
A presentación oficial deste novo colectivo terá lugar cunha ruta de sendeirismo pola Fonsagrada o domingo 12 de decembro. En realidade, tratarase de dúas rutas, unha moi accesible, para todos os públicos, incluídos nenos e maiores, e outra de maior dificultade. A primeira será de cinco quilómetros, con saída ás 11.30 horas; e a segunda, de 13 quilómetros e saída ás 9.00 horas. En ambos casos, desde a Praza do Concello e con visita á Aula Verde.
A actividade é gratuíta, contará con seguro para cada participante e os interesados poderanse inscribir nas redes sociais do club (Facebook e Instagram) ou nas oficinas do Concello. O éxito está sendo tan grande que xa se interesaron máis de setenta persoas nestas rutas.
Trátase da actividade de presentación coa que buscan darse a coñecer para animar á xente a facerse socia. A idea é organizar rutas e actividades gratuítas para os socios. Ademais, todo aquel que o desexe poderá federarse a través do club, tanto en montaña como en espeleoloxía, e estará asegurado todo o ano. Os interesados en unirse ao club poden contactar a través das redes sociais ou chamando ao Concello.