Refírome ás de fóra, as que levan o nome da nosa cidade polo mundo adiante. Destas, entendo que debería haber un censo se é que non está feito, e esixir un mínimo nivel estético —tamén ético?— para outorgarlles o prácet, aínda que me temo que iso é algo que ninguén pide.
Cando viaxo, o que non descobre polo acento a miña orixe, e pregunta a procedencia, desde agora quizais teña que responderlle coa pregunta tópica: e por que me pregunta iso?
A última vez, a semana pasada, en Mogán, de Gran Canaria, cando dixen que era de Lugo o interlocutor vacilou, dubidou, e acabou confesando que hai unha rúa con este nome onde se concentra a prostitución, e cando un di «vou a Lugo», vai ao que nós estamos pensando.
Pola IA pescudo que en Gran Canaria existe o Paseo de Lugo, ademais dunha rúa na cidade de Telde. Profundo na consulta, e acláraseme que onde máis locais e vivendas están vinculadas coa prostitución é na rúa Molino de Viento, barrio de Los Arenales, zona historicamente coñecida como «El Lugo». Asegúramo a confidente que «O Barrio de Lugo» é unha zona característica de Las Palmas por albergar historicamente este que se cualifica do máis vello oficio do mundo.
Non pescudei máis, non fora ser que comezasen a darme detalles innecesarios, porque co que hai que quedarse é que na illa de Gran Canaria o nome de Lugo ten mala nota, como lle pasaba en tempos ao Barrio do Miño, o máis histórico da capital.
Cando o interlocutor me contou aquilo, non acertei máis ca a balbucear que aquí en tempos houbo algo así, pero a zona estaba sendo rehabilitada na súa totalidade. Non prestou ao tema a máis mínima atención.