Lugo celebra o sábado a Feira do 48: artesanía, teatro, música e baile tradicional durante todo o día
LUGO
Cántigas e Frores organiza una festa pola cultura e a identidade galegas, con actividades de balde e para todos os públicos na Praza Maior
25 jun 2026 . Actualizado a las 00:32 h.A tradicional Feira do 48 volve a Lugo este sábado, día 27. Despois de ser adiada debido á chuvia, o pasado 9 de maio, a cita coa cultura e a identidade galegas, organizada por Cántigas e Frores, chegará á Praza Maior este sábado con mercado de artesanía, obradoiros de baile, concertos, pasarrúas, teatro e moita música tradicional. Será unha xornada repleta de actividades de balde para todos os públicos.
O encargado de dar comezo a esta festa, co pregón desta edición, é o escritor naviego Toño Núñez, mestre xubilado que compaxina a escrita co activismo cultural e coa música. Autor de varios libros para público infantil e adulto, coordina Xistral, a Revista Lucense de Creación Poética, e forma, xunto a Xosé Manuel do Castro, o dúo poético-musical ConVersos.
Concertos
A clausura, pola súa banda, chegará co concerto das pandereteiras Lagharteiras, que levan desde o 2007 traballando pola compilación, a conservación, a divulgación e a dignificación das músicas, cantares, instrumentos e vestimentas tradicionais galegas.
Pero haberá máis concertos: as viguesas Ferriñas Bravas, na sesión vermú, cun repertorio baseado na música tradicional galega e no traballo de campo; ou Murguinsky, pola noite, coa esencia das antigas murgas e un aire divertido e improvisado para poñer a todo o mundo a bailar con xotas, muiñeiras e agarrados.
Por outra banda, non faltarán os grupos oficiais de Cántigas e Frores. Para empezar a xornada, actuarán o Coro Galego e haberá pasarrúas da Banda de Gaitas e Percusións, polo centro da cidade. Ademais, o Grupo de Baile realizará unha Mostra de Baile Tradicional, acompañado da Murga, que tamén dará un concerto pola noite, e das Cantareiras e Cantareiros, que actuará na sesión vermú.
Non faltarán tampouco os obradoiros. De feito, antes dos concertos da noite, o mestre Ismael Rodríguez impartirá un obradoiro de baile tradicional. A maiores, pola tarde haberá tamén espectáculo de teatro, humor e música, da man de Migallas Teatro e o seu Cantaxoga. Os seus integrantes, María Campos e Carlos Yus, interpretarán cancións dos seus discos Canta connosco! e Pan de millo, ademais de divertidos sketchs cómicos, con rock, cumbia, rap, pasodobre, rumba ou fusión étnica.