Os alumnos creárono con plantas que figuran nos poemas da escritora nunha actividade encadrada no programa de educación ambiental Voz Natura
29 mar 2026 . Actualizado a las 12:55 h.O colexio público Poeta Avelino Díaz, no municipio de Meira, conta xa cun xardín dedicado a Rosalía de Castro e inspirado na súa obra. O pasado luns, os alumnos realizaron unha plantación dentro dun acto no que se conmemoraron varias datas significativas. «Celebramos ao mesmo tempo a chegada da primavera, o Día da Árbore [21 marzo], o Día da Poesía [na mesma data], o Día da Auga [22 de marzo] e o Día da Meteoroloxía [23 de marzo]», explica a profesora Beatriz Páramo Iglesias, que coordina no centro as actividades de educación ambiental do programa Voz Natura, no que se encadrou esta iniciativa.
O xardín foi creado con plantas que a escritora citou nos seus poemas: amorodo, romeu, lavanda, xasmín, pensamento, violeta, camelia, caravel e oliveira. Para este proxecto, sinala a docente, tomouse como referencia «unha obra preciosa»: O herbario de Rosalía, un libro de María López-Sández, María Isabel Fraga Vila e Miguel Fraga que foi publicado pola Fundación Rosalía de Castro. Previamente plantouse un limoeiro «como símbolo de enerxía e sorte». O acto foi presentado por alumnos de sexto de primaria. O xardín quedou sinalizado cun cartel principal e pequenos letreiros elaboradoss con pezas de quebracabezas e paus de comida asiática en desuso que pintaron e rotularon os alumnos de educación infantil.
As actividades de educación ambiental, di por outra parte a profesora, tamén comprenden un labor de reciclaxe que se leva a cabo desde hai anos. O colexio converteuse no actual curso escolar nun centro receptor de nove tipos de materiais de refugallo: plástico, cartón, vidro, aceite usado, tapóns, rotuladores, restos de elementos de escritura, pilas e tóners. Ademais, os restos orgánicos do horto escolar e das merendas aprovéitanse nun composteiro.
Recollida de vidros
No colexio, así mesmo, lévanse a cabo campañas trimestrais de recollida de vidro nas que os alumnos de cada clase recuperan envases que entregan as súas familias e veciños, e tamén os comercios da vila. «No primeiro trimestre recolléronse en cinco días 741 envases e no segundo chegouse a 1.554», apunta Beatriz Páramo. «A ver se nos superamos no terceiro trimestre», engade.
No centro organízanse tamén diversos obradoiros e actividades con materiais de refugallo nos que elaboran agasallos de Nadal e do Día do Amor. Por outra parte, os alumnos de todos os cursos participan nos traballos de preparación e cultivo dun horto escolar que consta de oito parcelas e no que proximamente farán unha plantación de primavera. «Imos plantar máis árbores froiteiras porque queremos ter unha zona específica para elas», di a profesora.
Páramo indica ademais que nas actividades de educación ambiental do colexio non só participan alumnos e profesores, senón tamén o persoal non docente, as familias, o Concello e diversas asociacións. «Sen estas persoas nada tería acontecido e o noso propósito é ir tecendo aos poucos redes de coidado do centro e do medio ambiente con accións que teñan un impacto real e que perduren no tempo», conclúe Beatriz Páramo.
Voz Natura é un programa de La Voz de Galicia desenvolvido pola Fundación Santiago Rey Fernández-Latorre e patrocinado pola Consellería de Medio Ambiente, a Deputación da Coruña, a Fundación Alcoa, El Corte Inglés, a Fundación Ramón Areces e Inditex. Todos os centros lucenses inscritos nesta edición participan na iniciativa Naturacción, patrocinada pola Fundación Alcoa co apoio de Alcoa San Ciprián e a colaboración da Consellería de Educación.