As ANPAS da provincia xa poden solicitar as axudas para visitar ata 25 granxas, empresas ou entidades agrogandeiras que participan neste proxecto educativo
29 abr 2022 . Actualizado a las 17:32 h.Que os alumnos lucenses poidan coñecer de primeira man como son as explotacións gandeiras, os sistemas de produción agrícola e as pequenas empresas de transformación de produtos agrogandeiros é o obxectivo co que presentou este venres o programa «Da Escola á Granxa», que promove Vicepresidencia da Deputación de Lugo.
Foi a deputada Mónica Freire quen presentou esta iniciativa, cuxas bases se publicaron no BOP. A convocatoria vai dirixida ás ANPAS, que poderán solicitar visitas a algunha das 25 granxas e entidades participantes, optando a unha ampla oferta educativa que inclúe desde visitas para coñecer de primeira man o manexo de animais e cultivos, obradoiros de elaboración de produtos e outras actividades divulgativas ligadas ao coñecemento da contorna e á educación ambiental.
Na presentación, Mónica Freire explicou que o programa incide na promoción e valorización do sector primario como un dos piares da actividade económica, do dinamismo social e do equilibrio territorial da provincia, na mesma dirección doutras iniciativas desenvolvidas desde a área de Medio Rural como a plataforma de venda en liña Son de Lugo ou a colaboración coas asociacións agrogandeiras.
Nesa liña Mónica Freire sinalou tamén a necesidade deste tipo de iniciativas «para que os nenos e nenas coñezan e valoren os produtos de proximidade e a importancia do sector primario tanto no abastecemento alimentario coma no mantemento da paixase, do territorio ou da cultura e afastar definitivamente ese estigma social arredor do rural, visibilizando referentes para que á hora de enfocar ás súas vidas vexan o rural como un espazo no que desenvolver os seus coñecementos e o seu talento».
No acto tamén interviron representantes das granxes e entidades que participan no programa: Diego Fernández da gandeiría Casa da Escola de Gundivós, en Sober, dedicada ao gando porcino e ovino; Suso Mazaira da queixería chantadina Airas Moniz, que ven de facerse con tres premios no Salón Gourmet de Madrid; e Iván Rodríguez, director técnico na Asociación de Criadores de Porco Celta (Asoporcel), da que forman parte catro das granxas incluídas no programa, que coincidiron en valorar a inicitiva como unha oportunidade para dar a coñecer ás xeracións máis novas o que se está a facer no rural.
Entidades participantes
«Da Escola á Granxa» ofrece ao alumnado a posibilidade de coñecer de primeira man a produtores e entidades de referencia no seu ámbito, e con experiencia na organización de actividades con escolares, procurando unha distribución por todo o territorio a fin de que a distancia no fora impedimento para que os centros educativos se acollan ao programa.
Na elección dos participantes buscouse configurar una oferta formativa variada, incluíndo granxas e producións de distintos ámbitos do sector agrícola e gandeiro, desde a produción de froitas ou produtos de horta, ata castañas, mel, ovos, leite e carnes de vacún, ovino, cabrún, avícola ou cabalar.
A oferta inclúe tamén obradoiros de agricultura ecolóxica a cargo de Adega nos propios centros, para as ANPAS que prefiran evitar os desprazamentos. A listaxe dos participantes pódese consultar no BOP ou na web da Deputación de Lugo.
Solicitudes
A convocatoria está dirixida a ANPAS de centros escolares públicos de educación infantil e de primaria de municipios de ata 20.000 habitantes. O importe das axudas oscilará entre os 300 e os 600 euros, en función do orzamento e das solicitudes que se tramiten xa que se trata dunha convocatoria en réxime de concorrencia.
As ANPAS dispoñen de 20 días hábiles, a contar desde este sábado, para tramitar as solicitudes, dacordo co que se indica nas bases publicadas no BOP e dispoñibles tamén na web da Deputación de Lugo, no apartado de Medio Rural. A concesión farase por orde de solicitude, ata esgotar o orzamento dispoñible, de 40.000 euros, entre as que cumpran cos requisitos establecidos.