O BNG pedirá que o pleno da Deputación de Lugo retire o nome Gayoso Castro á granxa provincial

la voz LUGO / LA VOZ

LUGO

Efrén Castro, voceiro do BNG na Deputación de Lugo ALBERTO LÓPEZ

Sinala que fai referencia a un cargo do franquismo e pedirá que se chame Complexo Agrogandeiro e de Investigación Universitari0

22 oct 2021 . Actualizado a las 16:36 h.

O BNG proporá ao pleno provincial da Deputación de Lugo un cambio na denominación da Granxa Gayoso Castro, retirando da nomeclatura deste complexo de titularidade provincial o nome de quen fora presidente da Deputación de Lugo durante o franquismo.

O voceiro nacionalista e deputado de Memoria Histórica, Efrén Castro, explicou que se trata de avanzar na retirada de recoñecementos e honras ao franquismo, como xa se fixo cos cadros dos presidentes da Deputación durante o ditadura que colgaban dos corredores do Pazo de San Marcos.

«A pesares dos anos transcorridos dende a aprobación da Lei de Memoria Histórica, aínda e necesario remover nas institucións os recordos que nos remiten a época da ditadura franquista. A día de hoxe, e despois da retirada das paredes dos corredores do Pazo de San Marcos dos cadros dos presidentes da institución nomeados polos dedos dos partícipes no golpe de Estado e na posterior ditadura militar, aínda continúa a empregarse o nome dun deles, Gayoso Castro, para referirse a granxa da Deputación», expuxo Efrén Castro, defendendo que «as institucións non poden acoller elementos de recoñecemento ao franquismo ou ás persoas que o representaron porque iso contribúe a branquear e lexitimar a ditadura, algo inaceptable nunha sociedade democrática».

A proposta do grupo nacionalista formula tamén unha denominación alternativa, Complexo Agrogandeiro e de Investigación Universitaria, facendo referencia á actividade agrogandeira e de investigación que se desenvolve no complexo, que acolle o Centro de Recría ou o Centro de Investigación Láctea, creado coa colaboración da Universidade de Santiago de Compostela..

«Entendemos que as accións en relación á memoria histórica non van dirixidas ao pasado senón ao futuro, polo que as actualizacións do nomenclátor deben recoller os novos usos e realidades», apuntou o voceiro do grupo nacionalista.

José Gayoso Castro entrou a formar parte da Comisión Xestora da Deputación de Lugo en maio de 1939 e ocupou a presidencia da entidade provincial entre 1941 e 1946. A denominación Granxa Gayoso Castro figura na sinaléctica e identificación da entrada do complexo de Castro Ribeiras de Lea.