O BNG reclamará na Deputación un acordo para que se constrúan as autovías pendentes de Lugo
LUGO
Busca unha resolución parecida á que aprobou por unanimidade o Parlamento galego
21 oct 2021 . Actualizado a las 14:59 h.O BNG presentará ao vindeiro pleno provincial do vindeiro martes 26 de outubro unha moción en demanda dunha mellora do investimento previsto polo goberno do Estado para as estradas e autovías da provincia en 2022.
Desde o grupo nacionalista sinalan que na proposta de orzamentos presentada polo executivo de PSOE e Unidas Podemos, as autoestradas da provincia só aparecen simbolicamente, confirmándose e incrementándose novamente os retrasos que viñan acumulando infraestruturas clave para a mobilidade na Mariña e na Galiza interior, como a A-74/Autovia da Mariña, a A-56 entre Lugo e Ourense ou a A-54 entre Lugo e Santiago.
Engaden os nacionalistas, que gobernan co PSOE na Deputación que, no relativo ás estradas, só se completan unhas partidas económicas xenéricas para «conservación de estradas» e «obras de seguridade vial» claramente escasas e pouco claras.
Fronte a estas previsións, o BNG pedirá o apoio da corporación provincial para que a proposta do goberno do Estado se mellore antes da súa aprobación no Congreso. Concretamente, segundo explicou o voceiro provincial, Efrén Castro, a moción que se presentará a debate propón reclamar que se prioricen a A-74 e a A-56, retomando a súa execución e propiciando que se poidan acurtar os prazos das obras e licitar no 2022 o tramo que se corresponde co intercambiador que unirá a A-54 coa N-540.
Tamén demandan que se inclúan nos orzamentos as cantidades necesarias para melloras nas estradas estatais, contemplando expresamente a rexeneración do firme nos treitos en peor estado.
O debate das peaxes
O voceiro nacionalista advertiu tamén «da ofensiva de cargos do Ministerio de Transportes, Mobilidade e Axenda Urbana para tratar de convencernos de que pra mellorar as estradas non hai máis solución que cobrar polo seu uso». Efrén Castro reiterou o rexeitamento do BNG a esta proposta «antisocial que prexudica ás traballadoras e traballadores e que incrementa os agravios comparativos de Galiza co resto do Estado, ante a falta de sistemas de mobilidade alternativos».
