Máis de 1.200 persoas de Lugo participarán nas viaxes gratuítas de «Coñece a túa provincia»

Laura López LUGO / LA VOZ

LUGO

Recepción ás primeiras asociacións que participaron no «Coñece a túa provincia».
Recepción ás primeiras asociacións que participaron no «Coñece a túa provincia».

A Asociación de Veciños de Ombreiro Río Miño e Carpe Diem de Lugo estrearon este martes as rutas

15 sep 2021 . Actualizado a las 05:00 h.

A Deputación de Lugo estreou este martes o programa de viaxes gratuítas «Coñece a túa provincia», no que esta tempada, ata o 10 de novembro, participarán máis de 1.200 persoas de 62 asociacións e colectivos lucenses. As primeiras entidades beneficiarias, a Asociación de Veciños de Ombreiro Río Miño e a Asociación Carpe Diem de Lugo, coñeceron a costa de Barreiros e Ribadeo, e os concellos de Lourenzá e Mondoñedo, respectivamente.

As actividades inclúen tamén unha visita a instalacións provinciais, que se converten en puntos de partida das viaxes. Na primeira xornada, coñeceron a historia do Pazo de San Marcos e o funcionamento da Granxa Gayoso Castro, en Castro de Rei.

O presidente, José Tomé, recibiu no salón de actos á primeira asociación da visita e destacou a gran acollida do «Coñece a túa Provincia», que recibiu 143 solicitudes para 62 viaxes dispoñibles, unha alta demanda que «demostra que acertamos con esta proposta e que debe ter continuidade».