A Rede Museística Provincial busca testemuñas para construír a historia destes colectivos en distintas comarcas lucenses
28 may 2021 . Actualizado a las 11:21 h.A Rede Museística Provincial e o Colectivo Agrocuir da Ulloa colaboran na posta en marcha dun proxecto de recuperación da memoria das persoas LGTBIQA+. Baixo o epígrafe «Facémonos escoitar?», o proxecto busca recoller testemuñas orais para construír a memoria LGTBIQA+ en distintas comarcas. A convocatoriaestá aberta a persoas, colectivos e institucións, que poidan achegar experiencias propias ou de acompañamento da loita polos dereitos e liberdades no que ten que ver coa diversidade sexual e de xénero.
«Non buscamos únicamente persoas LGTBIQA+, senón a calquera persoa que considere que ten algunha historia significativa que contar para a historia LGTBIQA+ da provincia de Lugo, ben sexa a través da súa propia vida, ben sexa como aliadas do colectivo LGTBIQA+. Unha sociedade inclusiva e diversa constrúese entre todas as persoas que a forman. E iso é o que buscamos: veciñas e veciños, nais, tíos, activistas, funcionarixs, etc. que compartan con nós algunha vivencia, lembranza ou anécdota vivida ao longo das súas vidas en relación á temática que nos ocupa», explicou na presentación Adrián Gallero, membro do Colectivo Agrocuir da Ulloa.
O traballo de campo e o proceso de documentación desenvolverase co apoio da Cooperativa Indaga. As persoas interesadas en achegar os seus testemuños deben dirixirse ao Colectivo Agrocuir da Ulloa, a través das súas redes sociais ou do enderezo electrónico agrocuirsdaulloa@gmail.com.
O obxectivo da recollida é crear diferentes materiais para visibilizar a diversidade sexual e de xénero na que convivimos co horizonte posto no 28 de xuño, Día Internacional do Orgullo.
Os obxectivos son un arquivo sonoro, un proxecto expositivo e un roteiro por Lugo
Así, crearase un arquivo sonoro en formato de mapa interactivo no que se volcarán, xeolocalizados, os audios da comunidade que se vaian recibindo. Tamén se deseñará unha exposición itinerante que se poderá visitar nos diferentes museos que conforman a Rede Museística Provincial e na que as protagonistas serán as persoas que contribúen, a través das súas propias vidas, a aportar diversidae e riqueza á historia colectiva das súas comunidades. Ademais, definirase un roteiro por Lugo, que una os lugares que son escenario da memoria LGTBIQA+ da cidade.
Na presentación da iniciativa, a vicepresidenta da Deputación de Lugo Maite Ferreiro incidiu na necesidade «de respaldarmos, como institucións, estas iniciativas que contribúen a visibilizar a diversidade da que somos parte». Remarcou tamén o interese de «construír relatos propios, vinculados ao noso territorio e especialmente ao rural, que en Galiza un papel fundamental na construción da identidade colectiva e que necesita se proxectado como espazo inclusivo e diverso».
Pola súa banda, a xerente da Rede Museística Encarna Lago encadrou a iniciativa na proposta dos museos provinciais como «museos sociais, sostibles e inclusivos», e aludiu ao lema que centrou este ano a celebración internacional do Día dos Museos «recuperar e reimaxinar». «Con este proxecto, miramos ao pasado para reimaxinar e acadar un futuro máis inclusivo», concluíu.