David Miranda: «A ordenación do territorio é unha oportunidade para facer fronte ao cambio climático e ás pandemias»

O director do Laboratorio do Territorio da USC informou dos Premios Rafael Crecente a Iniciativas Innovadoras de Xestión Territorial

David Miranda
David Miranda
L.L.
Lugo / La Voz

O Ibader e o Laboratorio do Territorio da USC veñen de convocar os Premios Rafael Crecente a Iniciativas Innovadoras de Xestión Territorial. David Miranda, director do laboratorio, falou deste certame no programa Voces de Lugo, de Radio Voz.

-Quen foi Rafael Crecente?

-Foi quen fundou o Laboratorio do Territorio; e foi un profesor da Escola Politécnica de Lugo que dedicou toda a súa vida profesional a investigar e traballar no ámbito da xestión territorial e da ordenación do territorio, cunha perspectiva integradora e holística. Os premios pretenden ser unha homenaxe a este entusiasta da ordenación territorial.

-É unha materia pendente de Galicia a ordenación territorial?

-Efectivamente. Nós entendémola como unha oportunidade para facer fronte a moitos retos territoriais actuais, incluídos o cambio climático e as pandemias.

-A quen vai dirixido o premio?

-Rafael sempre quería ofrecer oportunidades aos xoves; por iso este premio vai dirixido a todos aqueles recén egresados, que teñan ideas innovadoras no ámbito do desenvolvemento territorial, rural, da conservación, do medio ambiente...

-Que ideas foron premiadas en anteriores edicións?

-Todas as candidaturas son boas ideas, pero temos que seleccionar. Nesta ocasión hai dous premios con dotación económica, de 2.000 e 1.000 euros. Noutras edicións téñense recibido moi boas ideas: por exemplo, na convocatoria pasada o primeiro premio foi para dous rapaces que presentaron un sistema que mesturaba a innovación e a tradición para a xestión da auga. Tamén houbo algunhas aplicacións informáticas interesantes. Ten un ámbito de aplicación bastante amplo, así que animo a todos aqueles egresados que teñan unha idea que crean que pode encaixar, un traballo de fin de grao, de máster... que presenten candidatura.

-O Campus Terra canaliza ben ese talento.

-Si, os titulados que saen do Campus teñen esa orientación e perspectiva territorial.

-Ata cando se pode participar?

-Ata o 31 de marzo, e os premiados saberanse nun prazo máximo de dous meses. Eu animo a todo o mundo a participar, porque aínda que non sexan seleccionadas, desde o Ibader ou o Laboratorio pódese axudar aos rapaces a poñelas en práctica ou en valor. Non se precisa que sexa un proxecto moi maduro, o que se valora son as ideas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

David Miranda: «A ordenación do territorio é unha oportunidade para facer fronte ao cambio climático e ás pandemias»