Fallados os galardóns «MIHL Olladas» e os dos concursos de Samaín
23 nov 2020 . Actualizado a las 16:52 h.A área de Cultura do Concello repartiu varios premios nos últimos días. Por un lado, realizouse a entrega do premio de fotografía MIHL Olladas, que tiña por obxectivo difundir os elementos arquitectónicos do museo a través da fotografía. Buscaban imaxes coas que difundir a arquitectura do MIHL, que poñan en valor a mestura entre a arquitectura e a contorna ou que descubran os recunchos recónditos do edificio. O xurado outorgou os tres premios, dotados con 500, 350 e 200 euros para canxear por material fotográfico, a Katia Lodeiro, David Barreiro e Brais Zárate.
Por outra banda, a área de Cultura repartiu 6.000 euros en vales para os gañadores do concurso de disfraces e escaparates do Samaín. Os establecementos tiveron que decorar os seus escaparates coa temática do Samaín, e o xurado valorou a composición estética, orixinalidade e adecuación á temática. Os tres primeiros premios foron para a Queixaría Arcadio Coroas, El Faro de los Tres Mundos e Craft & Tea. Ademais, entregáronse cinco accésits a Triskel, Lilas Lencería, Mariña, Pauxi Pauxi Complementos e Go Diva's. No concurso de disfraces, as persoas participantes debían fotografarse nalgunha das salas museísticas municipais, e gañaron Daniel Revuelta, Pilar Cabello, Elliane Álvarez, Valeria Fernández, Chloe Álvarez, Paula López e Santiago Tarrío.