Perseidas sempre en agosto

María López Sández
María Sández TRIBUNA

LUGO

14 ago 2020 . Actualizado a las 09:02 h.

Ao chegarmos ao mes de agosto, nun deses ciclos que marcan, coa súa interminable cadencia, o paso do tempo, volven as Perseidas ou bágoas de San Lourenzo, como son coñecidas por moita xente.

É reconfortante a idea de que todo volve. Somos moitos os que gustamos das Perseidas, un acontecemento cósmico que ten lugar nese intre, máxico de seu, das noites de verán. No meu caso particular, isto entronca co aniversario da miña nai, que a piques estivo de chamarse Lourenza polo día en que naceu e por iso semella que as Perseidas veñan a iluminar a noite para ela e a lle acender no ceo a torta de aniversario.

Seica nesta ocasión o día óptimo para observalas será o 12 de agosto, hoxe mesmo, coincidindo coa fase minguante da lúa, que fará que se poidan admirar en todo o seu esplendor nun ceo máis escurecido.