O mundo mira a Lugo no debate sobre a nova museoloxía inclusiva

Máis de 500 persoas seguirán en liña o encontro internacional do Minom, que se celebra por primeira vez en España, baixo a organización da Rede Museística

O Pazo de Tor acolle o encontro presencial
O Pazo de Tor acolle o encontro presencial

Lugo / La Voz

O mundo ten desde hoxe e ata o día 1 os cinco sentidos postos en Lugo, sede do encontro internacional sobre museoloxía social, que por primeira vez se celebra en España; e faino baixo a organización da Rede Museística Provincial, en colaboración coa Universidade de Santiago de Compostela e a Universidade Lusófona de Lisboa. O debate, a XX Conferencia Internacional Galaico-Portuguesa Minom-Icom 2020, terá lugar hoxe e mañá en liña, para o que xa había o luns máis de 500 persoas inscritas, e os días 31 de xullo e 1 de agosto de xeito presencial no Pazo de Tor, só coa participación do comité científico. Este encontro tamén servirá para constituír o grupo de traballo do Minom-España.

Deste encontro, que este ano ten por lema Cara a unha museoloxía 4D: social, ambiental, política e economicamente sustentábel, sairá a declaración Minom de Lugo-Lisboa 2020, cunha serie de compromisos para poñer en práctica outra forma de entender os museos, que hoxe en día, en plena pandemia polo covid-19, cobra máis importancia se cabe. «Trátase do evento en museoloxía social máis importante do mundo», segundo explica Encarna Lago, xerente da Rede Museística Provincial, que leva máis de dúas décadas traballando segundo o modelo de sostibilidade vinculado ao Minom, que promove os valores da sociomuseoloxía, museoloxía crítica, inclusión, accesibilidade e igualdade.

O Minom (Movemento Internacional para unha Nova Museoloxía) foi fundado en 1985 en Lisboa, durante o Segundo Obradoiro Internacional de Nova Museoloxía, pero os seus principios ideolóxicos nacen na Declaración de Santiago, asinada en Chile en 1972. «Naceu dun movemento que promovía a importancia das persoas nos museos, que os obxectos dos museos son testemuñas humanas», relata Lago. Forman parte do Minom institucións de 11 países que traballan fomentando a participación cidadá dentro das organizacións museísticas, a recuperación da memoria e poñendo en valor o patrimonio cultural, natural e a diversidade.

As conferencias internacionais celébranse cada dous anos, baixo a organización dun país, a última, en Córdoba (Arxentina). Esta será a primeira vez que dúas nacións colaboren na súa organización.

Material doado ao Pazo de Tor

No ano 2017, ademais, o arquivo de todo o material recompilado nas anteriores conferencias internacionais, foi doado polo Minom ao Pazo de Tor, «un xesto que recoñece a forma de traballo que levamos a cabo desde a Rede», continúa Encarna Lago.

As xornadas virtuais da conferencia de museoloxía social poderán seguirse desde o Facebook da Rede Museística Provincial, previa inscrición. Lugo será escaparate do mundo entre as 18.00 e as 20.30 horas, desde España; entre as 17.00 e as 19.30 desde Portugal; e entre as 13.00 e as 15.30 horas desde Arxentina e Brasil. As inscricións para participar activamente no encontro e conseguir as acreditacións poden seguir realizándose a través do correo electrónico xxconferenciaminom@gmail.com.

Expertos lucenses, portugueses e brasileños, no comité organizador

O comité organizador está formado por Maite Ferreiro, vicepresidenta da Deputación de Lugo; Encarna Lago, xerente da Rede Museística; Ana Goy, do Centro de Estudo de Historia da Cidade; Mário Chagas, Minom Internacional-Museu da República, Rio de Janeiro; e Mário Moutinho, Minom Portugal-Universidade Lusófona ULHT, Lisboa.

Na xornada de hoxe intervirán Encarna Lago, da Rede; Mário Chagas, Minom Internacional; Ana Goy, USC; Aida Rechena, Minom Portugal; Auricelia Mercês, Museu Casa Bumba Meu Boi em Movimento Raízes do Gericino (Brasil); Bernarda Delgado Elías & Luis Alfredo Narváez Vargas, Ecomuseo de Túcume (Perú); Claudia Rose Ribeiro da Silva, Museu da Maré (Brasil); Gabriela Coronado-Te?llez, Museologia da ULHT (México-Portugal); Judite Primo, Cátedra Unesco Educação, Cidadania e diversidade Cultural (Portugal); e Leonardo Mellado González, Icom Chile.

Mañá intervirán Eduardo Ribotta, Ciencias Naturales e Instituto Miguel Lillo, Universidad Nacional de Tucuman (Argentina); William Alfonso López Rosas, Instituto Investigaciones Estéticas, Universidad Nacional de Colombia; Ana Goy, USC; Marcele Pereira, Minom Internacional; Raúl Andrés Méndez Lugo, Programas Sociales Secretaría de Bienestar (México); Soraya Bayuelo Castellar, Comunicaciones Montes Maria Linea 21 (Colombia); Suzenalson Kanindé, Museu Indígena Kanindé (Brasil); Vânia Brayner, Museologia ULHT (Brasil-Portugal); e Veronica Jeria, Asociación Trabajadorxs de Museos (Argentina).

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

O mundo mira a Lugo no debate sobre a nova museoloxía inclusiva