Tomé anuncia que a residencia de A Fonsagrada comenzará a funcionar a mediados de febreiro

O presidente da Deputación lembra que a residencia conta cunha superficie de 2.000 metros cadrados


LUGO

O Presidente da Deputación de Lugo, José Tomé, avanzou que o Centro de Atención a Maiores da Fonsagrada comezará a funcionar a mediados de febreiro. Díxoo durante a celebración da xornada de portas abertas organizada polo Organismo Provincial para mostrar á veciñanza do municipio e da comarca da Montaña unhas instalacións que contan con 28 prazas e que dará emprego a 25 persoas da zona. «Só quedan as valoracións finais dos 40 solicitantes das prazas para poder ver esta casa habitada», manifestou Tomé.

Tomé lembrou que a residencia conta cunha superficie de 2.000 metros cadrados distribuídos en tres andares e soto e para a súa construción, contou cunha dotación de mobiliario e equipamento cun orzamento de 2,37 millóns de euros. «Na planta baixa sitúanse os espazos comúns, como o comedor ou a sala de lectura e televisión, así como os servizos de enfermaría, cociña, lavandería... Na planta superior están as 14 habitacións dobres con baños», explicou o máximo responsable da Institución Provincial.

Ademais das instalacións, indicou Tomé, outro aspecto moi importante son as persoas que moverán o motor día a día para que todas estean ben. «A maior parte da xente que se incorpora a traballar no centro é desta zona, un factor moi importante, non só porque os usuarios e usuarias probablemente os coñezan, senón porque favorece que a xente nova se quede a vivir no rural grazas a un emprego estable».

Na xornada de portas abertas participou de feito parte do equipo que traballará no centro de maiores.

Os populares agardan que «este anuncio sexa o definitivo»

O viceportavoz do PP na Deputación, Javier Castiñeira, agarda que a Deputación cumpra as previsións anunciadas respecto a posta en funcionamento da residencia da terceira idade de A Fonsagrada tras ser inaugurada ata en tres ocasións e por tres presidentes diferentes. «Xa vai sendo hora de que fagan realidade a palabra dada nos últimos anos, pois do primeiro acto inaugural xa pasaron máis de catro anos, o que evidencia as liortas do PSOE as que provocaron que os usuarios aínda non puidesen entrar no centro», manifesta.

O popular denuncia que ao final son os veciños os que pagan as liortas políticas. «Pedimos rigor aos dirixentes da Deputación, agardando que este sexa o capítulo definitivo da residencia», conclúe.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Tomé anuncia que a residencia de A Fonsagrada comenzará a funcionar a mediados de febreiro