A Feira de Nadela, o escaparate gastronómico de entroido, busca relevo

A festa terá lugar o próximo domingo con postos de venda e actuacións musicais


Lugo / La Voz

A Feira do Entroido de Nadela é unha cita máis que consolidada no calendario festivo e gastronómico da comarca. O próximo domingo, día 24, volverá celebrarse -como cada domingo anterior ao Domingo de Entroido-, con postos de venda, actuacións musicais e intervencións das autoridades. Porén, os organizadores, da Asociación Carballeira de Nadela, buscan relevo. Despois de dúas décadas organizando a feira, na que cada ano se xuntan centos de persoas, buscan deixar o testemuño, algo que, de momento, non conseguiron. De non logralo, a feira corre o risco de desaparecer.

Segundo explican desde a organización -Carlos Puentes, Ángel López, Javier Mosteiro e Ignacio Besteiro-, a importancia desta feira non é só lúdica, senón que supón un bo escaparate para os produtores da zona, ademais dunha fonte de ingresos a maiores. Cada ano hai arredor dun cento de postos; a maioría, de produtores da contorna, que venden e dan a coñecer os seus produtos artesáns e gastronómicos: carne de porco (rabo, cacheira, orella, soá, bandullo, lacón, chourizos...), filloas, orellas, grelos, pan, viño, mel, licores... Ademais, haberá un posto de polbo para poder comer na feira. E todo, baixo carpa.

A maiores, o Concello de Lugo habilitou un servizo gratuíto de autobuses desde as 9.00 ata as 15.00 horas, diante do Instituto Virxe dos Ollos Grandes (Feminino), na Avenida de Ramón Ferreiro.

A festa comezará ás 9.00 horas, coa apertura dos postos de venda e exposición. Ás 12.00 horas comezará a música da man de Amigos do Acordeón, de Lugo, e terá lugar a entrega dun obsequio aos vendedores participantes. Ás 12.30 comezará a recepción das autoridades e a actuación do Orfeón Xoán Montes. A alcaldesa de Lugo, Lara Méndez, intervirá ás 13.00 horas cunhas verbas de benvida, xusto antes do pregón, que este ano correrá a cargo do comisario principal da Policía Nacional, Germán Rodríguez Castiñeira. Ao rematar, haberá actuacións de charangas e grupos folclóricos, ademais dunha sesión vermú amenizada por Adolfo Valiño.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

A Feira de Nadela, o escaparate gastronómico de entroido, busca relevo