O Concello de Outeiro de Rei presentou o programa de actividades de Promoción da Muller 2019, nas que xa está aberto o prazo de matrícula:
· Elaboración de xabóns e cosmética natural. Imparte Carmen López Arias, propietaria da Peluquería-BIO de Outeiro de Rei. A partir do 19 de febreiro. As participantes aprenderán a realizar xabóns para a limpeza doméstica e uso cosmético: xabón natural artesanal roupa?vaixela; xabón natural artesanal para a pel: de romeu, caléndula e manteca Karité; desmaquillante ultrasuave 100% vexetal con albaricoque; xel exfoliante de rosa e grans de papoula; serúm contorno de ollos con flor de aciano; crema facial de argancan; bálsamo con aceites para o corpo; baño capilar de aceites de coco e ricino; xampús vexetais; bálsamo para a pel multifunción...
· Iniciación ao horto ecolóxico. Imparte persoal técnico da empresa Nuevos Jardines. A partir do 14 de marzo. O obxectivo é conseguir de maneira o máis doada posible un horto familiar, onde cultivar hortalizas para consumo propio. As participantes aprenderán a crear e manter o seu propio horto, conservar e fomentar a creación de solo fértil para o horto, utilizar en cada momento as técnicas de cultivo máis adecuadas sen o uso de produtos tóxicos e contaminantes, controlar pragas e enfermidades de maneira biolóxica e producir alimentos de gran calidade nutricional.
· Taller de coiro. Imparte o artesán José Ramón Lleo Fisure, que leva toda unha vida adicada a traballar o coiro. Para aprender a elaborar e rematar diferentes pezas de coiro de forma artesá, feitas con ferramentas básicas e manuais. Analizarase o proceso de elaboración: deseño, realización do patrón e acabado das pezas.
· Concurso de fotografía «A muller traballadora no Concello de Outeiro de Rei». Para visibilizar o traballo das mulleres no concello en diferentes eidos da sociedade e en calquera ámbito (público ou privado). Establécense as categorías de fotografías antigas e fotografías actuais. O premio será 200 euros para a fotografía gañadora de cada sección. Os traballos pódense presentar no rexistro do Concello ata o día 25 de febreiro e cos que se reciban está previsto realizar unha exposición que será inaugurada o 8 de marzo, data na que se darán a coñecer as fotografías gañadoras e se entregarán os premios.
· Iniciación ao tiro con arco. A partir de xullo.
· De feira á Feira Medieval de Betanzos. 14 de xullo.
· Habilidades informáticas para tempos actuais. A partir de setembro.
· Reciclaxe e restauración de mobles. A partir de setembro.
· Iniciación ao scrapbooking. A partir de outubro.
· Día Internacional contra a Violencia de Xénero coa charla «Prevención, detección e pautas de actuación en casos de violencia de xénero». Luns 25 de novembro, 17.00 horas, Casa da Cultura.
· Ademais, o Concello mantén na web www.outeiroderei.org un enlace ao «Correo da igualdade» para que calquera poida realizar suxerencias.
Toda a información está dispoñible na web, na Casa da Cultura ou no 982 393 408.