Gran noticia para Os Ancares

O historiador e membros de Patrimonios dos Ancares, Xabier Moure, amosa a felicidade pola declaración de BIC do castro de Santa María


A mediados do pasado outubro, o Colectivo Patrimonio dos Ancares e a Anpa do CPI de Cervantes presentamos ante a Dirección Xeral do Patrimonio Cultural a solicitude de incoación de expediente para que se declare como Ben de Interese Cultural (BIC) o castro de Santa María. A noticia de que se inicia o procedemento prodúcenos unha enorme satisfacción xa que na provincia só hai dous castros BIC: o de Fazouro e o de Viladonga, tendo en conta ademais que na provincia contabilízanse preto de 1.300 xacementos deste tipo (140 na comarca dos Ancares).

O de Santa María é un dos símbolos de identidade de Cervantes e dos Ancares. Sobre o castro construíuse un cemiterio baixomedieval (apareceron 56 tumbas antropomorfas, moitas con restos óseos), a igrexa parroquial de orixe románica, o cemiterio e a casa reitoral. Nos anos 1995, 1996 e 1999 realizáronse intervencións arqueolóxicas parciais que sacaron á luz 26 vivendas de uso doméstico separadas por pequenas rúas. Situado nun estreito val de montaña, nun pequeno saínte de ladeira orixinado polo río Quindous, tributario do Navia, o castro de Santa María foi habitado entre o ano 50 a. C. e o século II d. C., no período de transición do mundo prerromano ao romano.

O castro é de grande interese dende o punto de vista científico xa que pode achegar moitos datos sobre a investigación no período de transición das culturas prerromanas ao mundo romano nunha zona, ata o de agora virxe, que podería servir de contraste e complemento a outros estudos realizados en zonas mineiras.

Cómpre resaltar que ata o de agora apenas un 25% do castro foi escavado e estudado. Esta declaración vai supoñer un importantísimo avance no seu estudo, ademais de se converter nun referente patrimonial de primeira orde

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
16 votos
Comentarios

Gran noticia para Os Ancares