O concelleiro de Deportes, José Manuel Díaz Grandío, e Graham Green e Carlos Somoza, membros da Asociación Lucense de Coches Antigos e Clásicos, presentaron o oitavo Rali Cidade de Lugo que se celebrará este sábado a partir das 10.00 horas na Praza Maior. Desenvolverase ao longo da xornada por estradas de Lugo, Castro de Ribeiras de Lea (11.20), Viveiro (13.45), Ferreira (17.35) e Mondoñedo (18.00). A carreira convocará na cidade a mútiples coches antigos, algúns tan míticos como o Porsche Carrera 911, o Lancia Fulvia, o Jaguar XK140, ou os clásicos Mercedes, o Mini ou o Renault 8 que farán as delicias dos lucenses. A proba está previsto que remate preto das 20.00 horas no mesmo lugar, no que os coches estarán aparcados ata as 21.30 horas para que todos os lucenses que o desexen podan achegarse.