A Porta Toledana foi a principal entrada desde a Idade Media

Adolfo de Abel Vilela

LUGO

A súa orixe é romana pero tivo reformas ao longo dos anos, como a de 1781

04 abr 2010 . Actualizado a las 02:00 h.

Nun documento de 1120 do bispo don Pedro III, que da os lindeiros do que era a cidade, di que acababa na torre Froilana, cara á parte oriental e a porta Toletana. En 1147 chámanlle igual, tal vez porque aínda non existía a capela de San Pedro de Fóra cuxa advocación daría nome novo á porta e ao barrio que xa aparece en 1176 no aniversario do arcediago don Rodrigo, ao citar unha casa o cal confirma a existencia da igrexa de San Pedro de Fóra a fins do século XII.

A denominación de Toletana ou Toledana pode ser debido a que está no camiño a Castela, e consecuentemente a Toledo ou Toletola, denominación dada polos árabes e mozárabes a esta urbe convertida na capital do reino de Afonso VI. Rodríguez Colmenero opina que o é por ir á Tolda. En calquera caso a orixe lingüística sería a mesmo pero diferente o enclave ou lugar xeográfico, dado que os Toletum, Toletola, Toleto, Toletanos, Toletani, Toletenses, Toldaos e Tolda, teñen a mesma raíz latina.

Por tanto é posible que a porta Toledana, fose a que conducía á Tolda, pero tampouco sería equivocado que sendo Lugo de refundación de Afonso VI, nun primeiro momento a porta levase o nome do Toletum romano, que foi capital da monarquía ata 1563, e que a porta Toletana substituíse a súa primitiva denominación cara o último terzo do XII, pola advocación de San Pedro, ao que se dedicou unha capela das súas inmediacións, ao que se engadía o cualificativo de Fóra, para distinguila da igrexa parroquial que estaba fronte ás ábsidas da catedral.